(Jornalista Jaime Pires/asistente editor Hermenegildo da Costa Tilman)
Dili (Timor Post)-Sekretáriu Jerál Partidu Demokrátiku (PD), António da Conceição “Kalohan”, konsidera kampaña ne’ebé maka daudaun ne’e partidu boot rua CNRT no FRETILIN halo ne’e la’ós ona kampaña kandidatu prezidente repúblika maibé kampaña partidu polítiku.
“Ami nia kandidatura Mariano Assanami Sabino, PD mak oferese maibé Kandidatu indivíduu, la’ós hanesan agora partidu Fretilin no CNRT ninia halo iha kampaña ne’e uza atributu no hari Bandeira partidu nian iha fatin-fatin, ha’u temi de’it mak partidu boot rua ne’e, CNRT no Fretilin,” dehan Kalohan, iha Sede PD, Kolmera kinta (03/03).
Sekretáriu jeral ne’e hatete, partidu hanesan instrumentu ida hodi hamosu de’it nia kandidatura, no kandidatura ne’e tenke ho prinsípiu indivíduu atu nune’e bainhira manan iha eleisaun hodi sai Prezidente Repúblika mós Prezidente ba povu no nasaun ida ne’e la’os ba interese partidu PD nian de’it.
“Ho ida ne’e ami husi kandidatura Assanami nian ami hakarak kaer metin istória ida ne’e, se Prezidente ida ne’e mak hakarak garante konstituisaun nia tenke hatene kedas ninia interpretasaun kona ba konstituisaun se lae, buat hotu-hotu ita fila fali ba iha 2020,” deklara Kalohan.
Portavós ne’e subliña liu tan, PD nia kandidatura, iha de’it mak fotografia ho númeru sorteiu kandidatura nian de’it, laiha tan atributu partidu hanesan bandeira, banner no seluktan.
“Ida ne’e hatudu katak, ami ne’e diferente ho CNRT no Fretilin, ami la dehan tan Partidu sira seluk, hakarak dehan mak Partidu boot rua ne’e,” Nia hakotu. (Lee notísia seluk iha jornál Timor Post/asesu you tube Timor Post)
852 total views, 3 views today
Bele hare Video Seluk :
Subscribe to Timorpost
