(Reportajen Gilberto dos Santos/Editor Mateus da Cruz)
DILI— Diretór Klínika Hospital Nasionál Guido Valadares, Marcelino Correia, informa, Bispu Maliana Dom Norberto do Amaral hodikalan ho karreta privadu hosi Maliana mai Dili, maibé to’o iha dalan klaran hetan atakasaun no tensaun sa’e maka’as nune’e nia motorista lori kedas mai Hospital Nasionál Guido Valadares (HNGV).
“Los duni ita nia amu bispu Maliana nia mai horikalan husi Maliana mai, iha dalan nia hetan atakasaun ho tensaun sa’e maka’as porvolta 190 ital, depois mai to’o ospitál diretamente ita lori baixa kuidadu insentivu iha ICU,” nia informa ba jornalista sira iha HNGV segunda (28/02).
Nia hatete, impaktu hosi tensaun ne’ebé sa’e maka’as halo amu bispu nia artikulasaun ko’alia halo ibun toos.
Tuir informasaun hosi família katak amu Bispu sofre hela moras kurasaun, no daudaun ne’e konsumu hela ai-moruk.
Ho moras kurasaun ne’ebe amu Bispu sofre hela, tuir diretor klinika, ida ne’e bele afeta mos tensaun sa’e maka’as no tensaun sa’e ne’e mak stroke kona halo ibun toos tiha.
Hatan kon-aba kondisaun agora amu Bispu nian, Diretór Klinika ne’e hatete, daudaun ne’e, hafoin hetan atendementu hosi médiku sira, Bispu nia kondisaun estavel fila fali.
“agora daudaun amu bispu nia tensaun tun fila fali, nia ibun ida ko’alia toos ne’e normal fila fali, la uza oksijéniu, nia nafatin iha ICU hodi halo observasaun no agora sei hasai raan hodi haree nia rezultadu,”nia dehan.
Daudaun ne’e médiku sira kontinua nafatin halo observasaun ba amu bispu nia kondisaun, bainhira informasaun hosi médiku sira dehan transfere ba rai li’ur, ospitál bele transfere.
Tuir informasaun, amu bispu atu mai tuir enkontru iha CET, maibé iha dalan klaran derrepente akontese, nune’e amu bispu nia motorista tula direta mai HNGV.(Lee notisia seluk iha jornal Timor Post/asesu youtube Timor Post)
881 total views, 3 views today
Bele hare Video Seluk :