(Reportajen Mariano Abi/ Editor Mateus da Cruz)
Dili (Timor Post) – Sekretáriu Estadu Komunikasaun Sosial (SEKOMS), Mericio dos Reis “Akara” husu ba sosiedade sivíl atu kontinua halo advokasia liu hosi tranzmite informasaun kredivel hodi tulun governu.
Maricio hatete, sosiedade sivíl nu’udar parseiru estratéjiku governu nian hodi tau matan ba lala’ok governu, nune’e daudaun ne’e tama ona ba tempu eleisaun maka papél sosiedade sivíl nian atu uza meius komunikasaun hodi halo sira nia advokasia ho di’ak hodi tulun governu atu la’o tuir planu ne’ebé iha.
“espera komunikasaun sosiedade sivíl ho Governu la’o di’ak no bele ajuda sira nia advokasia para tulun governu tanba agora iha festa demokrasia ida ne’e ita hakarak edukasaun sívika ne’e sa’e maka’as liu tan,” nia dehan iha Salaun FONGTIL, tersa, (15/02).
Nia dehan, liu hosi edukasaun sívika kona-ba eleisaun ba sidadaun sira bele hasa’e partisipasaun sidadaun sira nian iha eleisaun.
Iha sorin seluk Diretór interinu FONGTIL, Helio Dias da Silva, hatete, objetivu dialogo ne’e ko’alia kona ba situasaun polítiku rai laran no informasaun ne’ebé espalla iha media social, nune’e liu hosi dialogu ne’e sosiedade sira bele halo parseira ho governu hodi espalla informasaun ba públiku ho loloos.
Nia haktuir tan, agora daudaun Fongtil halo ona koordenasaun ho komisaun Nasionál Elisoens (CNE), hosi nun’e sosiedade sivíl sira ne’ebé daudaun ne’e rejistu iha Fongtil hamutuk 250, bele sai observadór iha eleisaun prezidensiál tinan ne’e.
“Daudaun ne’e ami alista hela sira ne’ebé servisu iha NGO atu sira bele hetan kartaun obrservasaun ba ita nia eleisaun ne’ebé sei akontese iha fulan oin mai,” nia hakotu. Lee notisia seluk iha jornal Timor Post/asesu you tube Timor Post)
638 total views, 3 views today
