Dili (Timor Post)- Polísia Nasionál Timor-Leste (PNTL), semana tolu ba kotuk to’o agora seidauk deteta ema tama ilegal fronteira entre Indonézia no Timor-Leste.
Dehan, Vise-Ministru Interior António Armindo ba jornalista sira iha nia servisu fatin Villa-Verde, sesta (11/02) ne’e.
“Movimentu Ilegal semana rua ka tolu liubá kuaze laiha ona, maibé antes ida ne’e iha ida ka rua kontinua tama fronteira ilegal liuliu iha terrestre ninia,” dehan Nia.
Nia subliña, tanba ita hotu hatene fronteira ne’e ho rai ida ne’ebé mak luan husi postu ida ba postu seluk ho kilometru ne’ebé mak dook entaun ema tenke halo.
“Maibé foin dadaun governu kria tan postu hamutuk 25 iha tinan kotuk no tinan ne’e, depois sei koloka tan forsa F-FDTL no PNTL atu asegura ita nia fronteira ida ne’e,” nia deklara.
Ne’ebé hahú tinan ida ne’e ba oin ita halo ona mudansa no sei aumenta tan membru balun liuliu sira atu ba prenxe iha postu foun sira neinak foin harii ne’e.
“Ho ida ne’e ita bele diminui ona movimentu Ilegal sira ne’e, aleinde ida ne’e mós antisipa ba krime sira seluk iha fronteira ne’e,” Nia esplika.
Jornalista: Jaime Pires
564 total views, 3 views today
