Dili (Timor Post)—Ministru Koordenador ba Asuntu Ekonómikus (MKAE) liuhusi Unidade apoiu OMK hetan tulun husi Governu Nova Zelándia ofisialmente fornese kursu kona-ba Politika Komersiu durante fulan 3 ba membru Grupu Traballu Adezaun Timor-Leste ba OMK ne’ebé hetan partisipasaun husi liña ministériu no ajensia autónoma sira.
Iha sesaun abertura kursu loron 13 janeiru 2022, Segundu Sekretaria husi Embaixada Nova Zelándia,Yvonne McKinnel salienta kona-ba komitmentu Governu Nova Zelándia hodi apoiu Governu Timor-Leste nia vontade iha prosesu nee.
“Nova Zelándia kontente tebes atu servisu hamutuk ho Timor-Leste atu fo apoio ba sira nia prosesu adezaun ba OMK no hein katak Timor-Leste bele sai membru OMK. Sai membru OMK importante ba nasaun sira ne’ebé buka atu aumenta sira nia komersiu liu husi kria sistema komersiu ida nebe previzivel no nakloke no promove diversifikasaun no dezenvolvimentu ekonómiku” hatete Yvonne McKinnel.
Kursu ho tipu virtual nee fornese husi peritu Stephanie Honey husi Nova Zelándia ne’ebé iha ona esperiensia tinan 25 iha setores públiku no privadu. Partispante ba kursu nee mai husi dirijenti sira husi varias institusoens estadu hanesan Ministériu Finansas, Ministériu Negósius Estranjeirus no Kooperasaun, Ministériu Transportes no Komunikasoins, Ministériu Turizmu, Komérsiu no Indústria, Ministériu Agrikultura no Peskas, Autoridade Nasional Petróleu no Minerais (ANPM), Serviço Rejistu Verifikasaun Emprezarial (SERVE), Autoridade Investigasaun no Fiskalizasaun Atividade Ekonómika, Sanitária no Alimentar (AIFAESA), Ajênsia Promosaun Investimentu no Esportasaun (TradeInvest), Institutu Qualidade Timor Leste (IQTL), Autoridade Alfandega no mós ekipa téknika husi Gabinete Ministru Koordenador ba Asuntu Ekonómikus (MKAE).
Durante fulan tolu, partisipante sira sei hetan materia importante balun hanesan vizaun jeral kona-ba polítika komersial até prinsípiu dezenvolvimentu polítika kona-ba komersial nian. Nune’e iha loron dahuluk, partisipante sira ho tentamente rona kona-ba deskrisaun polítika komersial hanesan sistema komérsiu bazea ba regra eko-sistema sira no mós kestaun atuais OMK nian.
Ministru Koordenador ba Asuntu Ekonómia (MKAE), Joaquim Amaral louva tebes ba apoiu ne’ebé oferese husi Governu Nova Zelándia atraves husi Embaisador Philip Hewitt.
“Onra no previlejiu boot tebes ba vontade Governu Nova Zelándia ne’ebé maka apoiu ona Governu Timor-Leste hodi fornese asisténsia téknika hodi mellora kualidade rekursu umanus Timor-Leste iha esforsu kona-ba adezaun Timor-Leste nian ba OMK”
Antes nee Governu Nova Zelándia fornese mós asistensia liuhusi treinamentu lian Ingles ba ofisiais husi grupu servisu OMK nian, liu husi kursu nebe espesializadu no komplementariu ba ‘Lian Ingles ba Politika Komersiu’ ne’ebé hato’o husi Lorosa’e English Language Institute (LELI). (cao)
938 total views, 3 views today
Bele hare Video Seluk :
Subscribe to Timorpost
