Jornalista Jaime Pires / Editór Noémio Falcão
Dili (Timor Post)—Sekretáriu Jerál Partidu CNRT, Jacinto Rigoberto klarifika, Konsellu Polítika Nasionál (CPN sigla Portugués) seidauk organiza reuniaun kona-ba preparasaun ba eleisaun prezidensiál.
Jacinto hatete, iha duni reuniaun ne’ebé akontese iha loron 12/01/2022 kona-ba preparasaun eleisaun prezidensiál ne’ebé Lospalos oan sira mak organiza, la’ós Sekretáriu Nasionál Partidu CNRT.
“Klaru iha duni konvite maibé la’ós sai husi sekretariadu nasionál, maibé sai husi ekipa sekretariadu ne’ebé mak hamutuk ho Lospalos oan sira, tanba presiza atu konsolida entre estrutura no Lospalos oan sira hodi fortifika sira nia estrutura iha baze, tanba ne’e mak sira konvoka enkontru ida ne’e,” Jacinto subliña ba Timor Post iha Sede Nasionál Partidu CNRT, Bairro dos Grilhos, Tersa (11/01/2022).
Notísia Relevante: Aban, CNRT Deskuti Asuntu Haat Inklui Preparasaun Ba Elprez
Tanba ne’e, Sekretáriu Jerál Partidu CNRT ne’e haktuir, nia parte hala’o de’it atividade hanesan baibain hodi hein hein Prezidete Repúblika dekreta data eleisaun prezidensiál.
“Ne’e duni atu fó hatene katak, CPN sei hein desizaun ruma ne’ebé mak fó sai bainhira CPN konvoka enkontru depois mak CPN bele fó sai orentasaun ka desizaun saida mak partidu bele fó sai,” Jacinto hatete.
Entretantu Prezidente Repúblika Francisco Guterres Lú Olo iha loron 6-7 janeiru 2022, rona ona partidu polítiku sira ho asentu iha Parlamentu Nasionál hodi hatene sira-nia hanoin kona-ba data eleisaun prezidensiál ne’ebé sei akontese, pelu menus, loron neen nulu, molok Prezidente atuál ramata ninia mandatu iha 20 maiu 2022.
Prezidente Repúblika hala’o knaar ne’e tuir artigu 12 husi Lei númeru 7/2006, 28 dezembru, ho alterasoins susesivas ba Lei ne’e, katak, molok dekreta data eleisaun, tenke rona uluk Governu no partidus polítikus ho asentu iha Parlamentu Nasionál.
Iha oportunidade, Prezidente Repúblika apela ba partidu polítiku hotu-hotu atu kontinua kumpre nafatin medidas prevensaun ba Covid-19 tanba eleisoins prezidensiais sei akontese iha tempu ne’ebé mundu enfrenta dadaun variante foun, Omicron.
Partidu sira asentu iha Parlamentu Nasionál inklui Partido Democrático (PD), Partido da Libertação Popular (PLP), Frente Mudança (FM), Frente Revolucionária de Timor-Leste Independente (FRETILIN), Partidu Unidade Dezenvolvimentu Demokrátiku (PUDD), Congresso Nacional para a Reconstrução de Timor-Leste (CNRT), Kmanek Haburas Unidade Nasional Timoroan (KHUNTO) no União Democrática Timorense (UDT).
Molok halo enkontru ho líderes partidus polítikus sira-nian, Prezidente Repúblika rona tiha ona Governu, liuhusi Primeiru-Ministru, Jeneral Taur Matan Ruak no Ministru Administrasaun Estatal Miguel Carvalho.
Prezidente Repúblika rona mós Comissão Nacional de Eleições (CNE) no Secretariado Técnico de Administração Eleitoral (STAE) kona-ba preparativus ba eleisaun prezidensiál 2022.
Ba eleisaun prezidensiál tinan ne’e, númeru sentru votasaun no estasaun votu sei aumenta iha territóriu Timor-Leste tomak. Ba eleisaun antesipada 2018, iha sentru votasaun 885. Ba eleisaun prezidensiál 2022, sentru votasaun sei aumenta ba 1200. Númeru estasaun votu sei aumenta husi 1260 (iha 2018) ba 1500, iha tinan 2022.
Hasa’e númeru sentru votasaun no estasaun votu permite hakbesik liután fatin votasaun ba eleitór sira no nune’e, maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027. Nune’e, taxa partisipasaun eleitór sei sa’e iha eleisaun tuir mai.
Ho númeru sentru no estasaun barak liu, númeru votante iha fatin ida-idak sei menus. Tanba buka hamenus númeru eleitór halibur iha fatin ida, Governu Timor-Leste foti medida di’ak ida atu proteje mós ita nia ema husi vírus moras Covid-19 nian, ne’ebé sei la’o nafatin iha mundu, ho variante oioin.
342 total views, 3 views today
