Jornalista Jaime Pires / Editór Noémio Falcão
Dili (Timor Post)—Polísia Nasionál Timor Leste (PNTL) liuliu Unidade Patrullamentu Fronteira (UPF) antisipa movimentu ilegal husi membru sira husi Timor Leste ba partisipa festa aniversáriu Grupu Arte-Marsiál Persaudaraan Setia Hati Terate (PSHT) ba-dala-100 iha Nusa Tenggara Timur (NTT)-Repúblika Indonézia (RI).
Komadante Jerál PNTL, Komisáriu Faustino da Costa subliña, UPF toma atensaun ida ne’e atu labele akontese tan hanesan tinan kotuk, membru sira timoroan hakat ilegal liuhusi fronteira no hetan kapturasaun husi Polísia Repúbliaka Indonézia (POLRI) mak foin halo deportasaun.
“Iha tinan 2022 arte marsiais PSHT sei selebra sira nia ezisténsia ba-dala-100. Tanba ne’e, PNTL tenke esforsu liuliu sira ne’ebé iha fronteira, atu labele akontese tan hanesan tinan kotuk,” Faustino subliña iha Kuartel Jerál PNTL Kaikoli, Dili, Segunda (03/01/2022).
Nia hatutan, aleinde UPF, orientasaun ba ona komandante polísia iha área sira liga ho fronteira atu servisu hamutuk asegura servisu ida ne’e.
“Koordenasaun ne’e importante atu evita no ita lakohi buat ne’ebé mak akontese iha tinan 2021 akontese tan fali iha tinan 2022 ne’e,” Faustino subliña.
924 total views, 3 views today
