Dili (Timor Post)—Arsebispu Arkedioseze Metropolitanu Dili, Don Virgílio do Carmos da Silva subliña, iha mundu joga poder ema nian, maibé Jesus nia prezensa atu muda atetude ida ne’e.
“Maromak halo-an ba mane hodi aprejenta mai ita katak, iha mundu ne’e joga poder ema ninian. Poder domíniu, poder kontrola – poder dehan ha’u mak kontra ema seluk ninia vida. Bainhira ha’u iha forsa, ema seluk ha’u bele uza. Maibé Maromak halo-an ba mane atu mai muda ita nia atetude ida ne’e, atu ita la aproveita malu, maibé ita apriende sai boot atu ukun, atu lidera, atu hetan responsabilidade, ne’e signifika serví,” Don Virgílio subliña iha nia mensajen liuhusi kanal GMNtv hafoin selebrasaun Misa Kalan Natal, 24 Dezembru 2021.
Don Virgílio hatutan, la’os ida ne’ebé sai boot mak kaer ukun, maibé ida ne’ebé hakarak sai boot tenke apriende sai kiik.
Don Virgílio haktuir mos Amu Papa Francisco nia mensajen ho signifikadu sira sai hanesan sasukat katak Natal tinan ne’e la’ós sai de’it momentu ba família sira atu halibur hamutuk, maibé liuliu oinsá mak sarani sira hotu selebra ho momentu Santu.
“Ita presiza banati tuir Jesus-Maromak ne’ebé halo-an kiik ne’e hatudu hakraik-an, tanba ita nia hakraik-an maka ita bele rekoñese Maromak ne’e nia boot, ita nia hakraik-an maka ita bele loke-an simu Nia,” Don Virgílio hatutan.
Natal momentu di’ak ba ema hotu bainhira iha sosiedade, sidade no uma laran, hatene hakraik-an ba malu, rekoñese di’ak iha ema ida-idak.
“Maromak tún, halo-an ba ema, ne’e foti ita, katak ita ida-idak lori illas Maromak nian. Katak ita bele deskobre ka la’e iha ida-idak prezensa Maromak ninian,” Don Virgílio hatete.
Ho dalan ne’e de’it maka Natal bele lori mudansa no muda ema ida-idak nia hanoin, mentalidade no komportamentu.
Don Virgílio halo diferénsia natal tinan kotuk ho tinan ne’e. “Natal tinan kotuk kuandu ita misa hotu ita rona issu, númeru COVID aumenta, iha posibilidade boot atu taka misa tuir mai, entaun ita kahur tinan kotuk ne’e entre ksolok, pániku ho atrapalla tanba ita la prontu atu suspende eukaristia. Tinan ida ne’e agradese ba Maromak, dezde adventu mai too agora ita hakmatek loos,” Don Virgílio hatete.
Tanba ne’e, Don Virgílio fiar katak, natal tinan ida ne’e sai duni momentu ksolok ba sarani tomak iha mundu espesialmente iha Timor Leste.
Selebrasaun misa Kalan Natal iha Igreja Katedral-Dili marka mós prezensa husi Prezidente Repúblika Francisco Guterres Lú Olo akompaña husi espoza Cidália Lopes Nobre Mouzinho Guterres no família.
Hafoin misa, Xefe Estadu hatete durante tinan ne’e Timor-Leste no mundu hasoru dejafiu oinoin, durante ema hotu nia moris.
“Ita hotu hakat liu dejafiu oinoin iha ita hotu nia moris durante tempu ida ne’e, ohin ha’u mai ho ha’u nia família partisipa misa ida ne’e hamutuk ho sarani sira para atu reflesaun ba loron na’i jesus moris. simu ho haksolok mensajén husi ita nia Bispu Dili (Dom Virgílio do Carmo da Silva) no simu ho haksolok mensajen husi papa Francisco ne’ebé hato’o ba sarani sira hotu iha mundu.”
“Tanba nee, hanesan sarani nomos Prezidente Repúblika hakarak deseja feliz natal ba povu Timor-Leste tomak, em partikular ba ita-nia titular orgaun soberania, ba eis titulares sira hotu, ba sarani sira hotu. ami-nia votus feliz natal, espera katak sei hakat liutan ba tinan foun 2022 ho susesu.” (cao)
657 total views, 3 views today
