Dili (Timor Post)—Milena Pires nu’udar kandidatura ba Prezidente Repúblika periodu 2022-2027 ne’ebé pronunsia ona nia intensaun hatúr nia pozisaun kona-ba kazu orfonatu Topu Honis.
“Desizaun ne’ebé Tribunal Distrital Oekusi sei hasai ohin loron, kona ba kazu abuzu sexual ba labarik iha orfanatu, sei sai sasukat ba kazus sira hanesan iha futuru,” Milena Pires hakerek iha nia pájina offisiál Facebook.
Lee Notisia Relevante: Vítima ba Kazu Topu Honis Tanis no Halerik Bainhira Polísia Lori Richard Dasbackh ba Prizaun, Defeza sei Halo Rekursu
Milena dehan, kazu ne’e la’ós primeira-vez ne’ebé Timor-Leste nia Tribunal prosesa kazu abuzu sexual kontra labarik, maibé tuir saida mak durante ne’e akontese, kazu ne mak hafahe opiniaun publiku no mosu pro ho kontra maka’as los.
“Iha ita nia Estadu Direitu Demokratiku, Tribunal mak fatin los atu disidi baenhira iha akuzasaun krimi, inklui kazus ne’ebé envolve labarik sira,” Milena hatutan.
Lee Notisia Relevante: Desizaun Finál ba Kazu Topu Honis, Xanana Hamutuk ho Vítima no Eis Padre RD iha Tribunál
Espesialmente iha kazu hanesan ne’e, Milena konklui, instituisaun estadu iha responsabilidade tomak atu fo protesaun ba labarik sira ho sira nia familia, no inklui mos defensores no advogadus labarik sira nian.
“Nudar país ida foun ne’ebé restaura independensia besik tinan 20 nia laran, ita sei presiza hadi’a buat barak iha rai laran, inklui mos ita nia institusaun estadu,” Milena hatete.
Lee Notisia Relevante: Tribunál Deside Kadeia Tinan 12 ba Eis Padre Richard Dasbackh
Maibé nia subliña, buat ida klaru los kona-ba kazu ida nee, Tribunal nia disizaun no disidi oin sa, labele fo dalan ba ameasa no perseguisaun kontra se-se de’it, no liu liu estadu iha obrigasaun atu fo protesaun ba sasin, labarik ho sira nia familia no mos sira nia defensores sira.
“Iha ita nia Estadu Direitu Demokratiku, ita hotu-hotu iha obrigasaun atu kontribui nafatin atu hotu-hotu hanesan iha lei nia okos,” diplomata senior feto foinsa’e timoroan no kandidatura ba xefe estadu ne’e konklui. (cao)
https://timorpost.com/desizaun-final-ba-kazu-topu-honis-xanana-hamutuk-ho-vitima-no-eis-padre-rd-iha-tribunal/
1,036 total views, 3 views today
Bele hare Video Seluk :