ADVERTISEMENT

Brazil Tulun Vítima Siklone Seroja iha Timor Leste ho Orsamentu Rihun $120

  • Share
Foto Espesial

Dili (Timor Post)Governu Brazil liuhusi Nasoins Unidas – Programa Ai-han Mundial (PAM) tulun orsamentu Dolar Amerikanu rihun 120 ba asisténsia umanitaria atu suporta atividade moris loron-loron ba vítima ne’ebé afeta husi inundasaun ne’ebé akontese fulan Abril iha Timor-Leste.

Imajen ne’e hatudu parte sira lansa akordu kontribuisaun entre governu Brazil, WFP ho MAP. Foto Espesiál

Komunikadu ba imprensa ne’ebé Timor Post assesu, Sesta (10/12/2021) haktuir, kontribuisaun ne’e sei utiliza atu suporta melloramentu produtividade hortikúltura no pekuaria. Liuhusi esforsu apoiu Ministériu Agrikultura no Peskas (MAP), kontribuisaun ida ne’e ninia objetivu mak atu mellora produtividade hortikúltura, pekuaria ho grupu to’os na’in sira. Benefísiu direta ba distribuisaun fini, pesticida, adubu, no ekipamentu agrikultór nian mak grupu to’os na’in sira. Fundu refere sei suporta benefisiariu sira liu husi MAP atu sosa animal hodi hakiak no fó kapasitasaun konabá jestaun pekuaria. Fundu ne’e sei benefisia grupu to’os na’in hamutuk 11 no total benefisiariu direta hamutuk 193 ne’ebé hetan afetadu husi inundasaun akontese iha fulan Abril atu halo atividade pekuaria ba periodu fulan 6.

Ministru Agrikultura no Peskas, Pedro dos Reis hatete, “kontribuisaun akordu entre Governu Brazil no WFP hodi suporta Governu Timor-Leste ne’e importante tebes atu hadi’ak populasaun sira nia atividade moris loron-loron, tan ne’e ha’u hakarak agradese Governu Brazil nia apoiu jenerozu no kometimentu.” Eng. Pedro mós hatete katak “Ministériu Agrikultura no Peskas kontinua iha vontade atu servisu hamutuk ho Governu Brazil, WFP no parseiru dezenvolvimentu sira seluk iha setór ne’ebé ha’u lidera atu atinji objetivu komún ne’ebé ita hotu hakarak.”

Iha Timor-Leste, seguransa ai-han no malnutrisaun kontinua sai dezafiu boot, total populasaun hamutuk 1/3 mak sofre ba inseguransa ai-han. Labarik tinan 5 mai kraik ne’ebé badak hamutuk 47%, krekas hamutuk 8.6%, no todan menus hamutuk 32%. Total feto ho idade reprodutiva hamutuk 30% mak sofre husi anemia.

Lee Mós:
20 Agostu Sei Iha Promosaun Ba Militár

Espesifikamente, impaktu husi inundasaun fulan Abril no COVID-19 sai kauza boot ba inseguransa ai-han no lakuna nutrisaun iha Timor-Leste. Situasaun ida ne’e afeta maka’as mós seguransa ai-han, korrente fornesimentu, no funsionamentu merkadoria. Uma kain hamutuk 31,000 resin iha Timor-Leste mak hetan afetadu, no rai agrikultór hamutuk hektare 2,660 mak hetan estragu.

Ho situasaun folin ai-han sa’e no rendimentu tun maka’as, uma kain hamutuk 38% mak tenke redús sira nia kualidade ai-han tanba menus osan ka rekursu. Populasaun hamutuk 21% ne’ebé hetan rendimentu ki’ik tenke hamenus hahán, tuir relatóriu asesmentu impaktu sósiu-ekonomia husi Governu Timor-Leste.

“WFP agradese ba kontribuisaun jenerozu husi Brazil. Suporta ida ne’e sei ajuda komunidade no grupu to’os na’in sira hodi rekopera fali husi inundasaun ne’ebé akontese iha fulan Abril” hatete Ashley James Rogers, Reprezentante WFP Timor-Leste Interinu.

Lee Mós:
Komandu Covalima Halo Operasaun Rigorozu iha Fronteira

“Ha’u kontente lansa programa ida ne’e ho WFP no Ministériu Agrikultura no Peskas. Brazil prontu atu haforsa koordenasaun no parseria servisu ho ONU no ajuda Timor-Leste hodi atinji meta Objetivu Dezenvolvimentu Sustentável 2030 inklui hakotu hamlaha no halo transformasaun ba sistema ai-han” hatete Embaixadór Brazil Mauricio Medeiros Assis.

Fundu husi Governu Brazil sei ajuda grupu hortikúltura no pekuaria hodi hadi’ak sira nia rendimentu liu husi rekursu no ligasaun ho merkadoria husi munisipiu Bobonaro ba kapitál Dili. Iha esforsu ida ne’e, Ministériu Agrikultura no Peskas (MAP) planu atu suporta grupu to’os na’in sira hodi fasilita sira liu husi MAP ninia konesaun ba entidade merkadoria. (cao)

 173 total views,  6 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Brazil Tulun Vítima Siklone Seroja iha Timor Le…” A few seconds ago
  • Share
ADVERTISEMENT
SCROLL FILA BA NOTISIA


Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error: