DILI—Sekretáriu Estadu Meiu Ambiente, Diometrio Amaral hatete, setór privadu sira tenke iha inisiativa rasik hodi dezenvolve-an liuhusi atividade negósiu sira hodi hetan osan hodi la depende de’it ba projeitu husi governu.
Setór privadu labele depende de’it ba servisu públiku, no orsamentu jerál estadu, tanba ne’e atu funsiona no dinamiza ekonomia Timor Leste, maka setór privadu, kooperativa sai sasukat ne’ebé signifikadu tebes, tanba ne’e tenke iha korazen atu investe iha atividade kiik maka ba boot.
“Ha’u hanoin la’ós tempu ona, setór privadu no setór kooperativa atu tuir nafatin de’it projetu públiku nian, maibé tenke iha inisiativa rasik, no ohin loron iha inisiativa barak maka mosu iha CCI-TL, balun hakiak manu, no balun halo negósiu kafé no sira seluk, ida ne’e hanesan inisiativa ne’ebé di’ak tebes,” kestaun ne’e fo sai husi Sekretáriu Estadu Meu Ambiente, Deometro Amaral iha nia diskursu bainhira partesipa iha inagurasaun Kafétaria ne’ebé harii husi kompañia K2C, iha loron Segunda (03/02/2020).
Nia mós husu ba Timor oan sira atu labele kopia ema seluk ninia hanoin, ne’e ladun di’ak maibé atividade ne’ebé mai duni husi hanoin no kreatividade ema ida idak nian ne’e, sei lori susesu tanba ne’e husu ba setór privadu no joven sira atu iha kreativa ne’ebé di’ak, hodi promove produtu rai laran iha merkadu rai laran nomos merkadu rai liur.
Iha fatin hanesan Vise Prezidente Camara Comersiu Industria Timor Leste (CCI-TL), Rui Castro hatutan, setór privadu sira depende ba projetu governu tanba, setór privadu maka parseiru governu nian.
“Ha’u hanoin setór privadu iha kompeténsia atu depende ba governu tanba setór privadu maka ai-rin ba ekonomia ne’ebé la’o iha rai laran, tanba ne’e prozetu sira ne’e Timor oan iha direitu atu kaer, la’ós atu oferese ho ba ema liur no ikus mai ita nia osan semo hotu ba rai liur,” Rui Castro hatete.
Nune’e mós Reprezentante povu iha uma fukun Parlamentu Nasional Deputadu Antonio da Conceição hatutan, setór privadu nafatin depende ba orsamentu jerál estadu, tanba estadu mós sei deve hela setór privadu sira tinan ba tinan ona setór privadu sira halerik, maibé too agora seidauk halo pagamentu hotu, tanba ne’e setór privadu iha dever tomak atu depende ba projetu governu nian. (jxy)
689 total views, 3 views today
