Jornalista Estajiáriu Mariano Do Santos / Editór Noémio Falcão
Dili (Timor Post)—Governu Repúblika Indonézia (RI) liuhusi Embaixada iha Dili offisialmente entrega ró uza ba ambulánsia ida ba Servisu Nasionál Ambulánsia i Emerjénsia Medikal, Institutu Públiku (SNAEM.IP)-Ministériu Saúde.
Ró ambulánsia ne’ebé sosa ho folin rihun $200 sei halo operasaun hodi evakua ema moras iha área ne’ebé bele asesu liuliu Ataúro.
Serimonia ne’e hala’o iha Portu Dili, Kinta (25/11/2021.
Partisipa iha serimónia entrega no simu ró ambulánsia ne’e, Ministra Saúde Odete Maria Freitas Belo, Diretór SNAEM.IP Horacio Sarmento da Costa, reprezentante Embaixador Indonézia Alamsyah, reprezentante husi Ministru Finansas Diretór Jerál Jestaun Rekursu Externa, António Freitas no konvidadus sira seluk.
Hafoin serimónia, Diretór Horacio ba Jornalista sira, agradese ba governu RI nia tulun ne’e folin boot tebes.
“Ita espera katak ba oin ne’e la’ós de’it Atauro, bele mos RAEOA no bele mos iha área sira ne’ebé kuandu asesu transporte la bele, entaun ita bele evakua ita nia pasiente sira,” Diretór Horacio subliña.
Horacio hatete, nia parte maka toma responsabilidade ba operasaun ró ne’e no kona-ba manutensaun sei halo kooperasaun nafatin ho kompañia ne’ebé mak sosa ro ne’e ba.
“Para depois ba oin ne’e ita sei haree manutensaun tékniku sira kapasitasaun ba ita nia nahkoda ou asisten nahkoda sira ne’ebé mak iha,” Horacio hatete.
Daudaun ne’e SNAEM.IP prepara ona rekursu ba operasaun na’in-9 kompostu husi nahkoda nain-3, asistente ABK na’in-6, no sei koloka médiku na’in-24 hala’o servisu rotasaun.
Entretantu Diretór Jeral Diresaun Rekursu Ministériu Finansas, António Freitas haktuir, ró ne’ebé iha rejultadu husi akordu Ministériu Finansas ho Embaixada Indonézia ne’ebé hala’o iha loron 17 dezembru 2020.
Nia subliña, ajudu ne’e hanesan símbolu amizade verdadeiru ida.
923 total views, 3 views today
Bele hare Video Seluk :