Jornalista Jaime Pires / Editór Noémio Falcão
Dili (Timor Post)—Governu lideradu Primeiru Ministru Taur Matan Ruak la propoin tan estadu emerjénsia hafoin análiza pontu situasaun epidemiolójika nasionál, ne’ebé aprezenta husi Koordenadór sira Sala Situasaun-Sentru Integradu Jestaun Krize (SIJK).
Konkluzaun ne’e governu tetu klean mos kona-ba alterasaun dahuluk Lei nú. 10/2004, Lei Sistema Saúde, ne’ebé Prezidente Repúblika Francisco Guterres Lú Olo promulga ona.
“La propoin renovasaun estadu emerjénsia, ne’ebé sei termina iha loron 28 fulan-novembru tuir mai,” Ministru Prezidénsia Konsellu Ministru (MPKM), Fidelis Leite Magalhães ba Jornalista sira, Kuarta (24/11/2021) hafoin reuñiaun Konsellu Ministru.
Relasiona ho kestaun ne’e, Fidelis haktuir, konsellu ministru aprova projetu Dekretu-Lei kona-ba medida ezesionál no temporária vijilánsia sanitária nian ba resposta pandemia COVID-19.
Kompara ho medida vijente sira no diploma mantein parte boot husi medida imposta no rejista alterasaun balun, hanesan bainhira tama mai territóriu nasionál la presiza hetan autorizasaun husi Primeiru-Ministru, maibé tenke sujeita nafatin ba kontrolu sanitáriu no hatudu rezultadu negativu teste SARS-CoV-2 nian.
Lisensa, autoridade no aktu administrativu sira seluk no dokumentu sira mantein válidu to’o loron 31 fulan-dezembru tinan 2021, bainhira prazu la fiksa tuir akordu internasionál la tuir lei ne’ebé Parlamentu Nasionál aprova tuir rezerva kompeténsia absoluta.
Nafatin halo izolamentu profilátiku obrigatóriu iha termu sira ne’ebé define antes ona.
1,472 total views, 3 views today
Bele hare Video Seluk :