Jornalista Jaime Pires / Editór Noémio Falcão
Dili (Timor Post)—Governu liuhusi Ministériu Transporte no Komunikasaun (MTK) atribui ona sertifikadu ba kompañia telekomunikasaun foun ne’ebé harii husi timoroan sira ho naran Ceslink Lda.
“Ohin ha’u relata ba primeiru ministru assuntu kona-ba iha loron hirak liubá governu liuhusi Ministeriu Transporte no Komunikasaun atribui sertifikadu ba a operador Ceslink Lda, nu’udar operador telekomunikasaun dahaat iha Timor-Leste,” Ministru José Agostinho da Silva hatete ba Jornalista sira iha Palásiu Governu, Dili, Tersa (23/11/2021) hafoin informa progresu ne’e ba Primeiru Ministru Taur Matan Ruak.
Nia dehan, atribuisaun sertifikadu ne’e nu’udar knaar ida hodi fó biban ba kompañia foun ne’e bele hala’o atendimentu públiku ho di’ak.
“Depois de ida ne’e sira tenke kumpre sira nia dever ba kofre estadu nia ka selu taxa ba Governu bainhira sira hahú funsiona ona,” Ministru José hatete.
Nia subliña, ba kompañia sira ne’ebé mak hanesan Guardamor no Elit Komputer sira ne’ebé mak antes ne’e komete ona kazu internet ilegal, ba oin MTK ho autoridade komunikasuan iha komitmentu atu apoiu ba buat ne’ebé mak iha legalidade.
Nia reforsa, maibé ba kazu sira ne’ebé mak sira komete ne’e prosedi ba prosesu investigasaun maibé funsionamentu ne’e kontinua la’o nafatin, ne’ebé tempu ida agora ba oin ne’e oinsá mak ita atu formaliza sira nia estatutu.
978 total views, 6 views today
