Jornalista Caetano Guterres / Editór Noémio Falcão
Baukau (Timor Post)—Governu sentral aloka orsamentu ba selebrasaun loron Proklamasaun Independénsia RDTL ba-dala 46 ho total rihun $71 ($.71,000.00).
Selebrasaun ne’ebé sei hala’o iha Aldeia Dara-Sula, Suku Gariuai, Postu Administrativu Baukau Villa ne’e, atinji ona porsentu 65, sei falta desizaun ba loke fatin jogu no feira.
“Fatin komemorasaun ateru hotu ona, riin bandeira, eletrisidade, bee dada hotu ona agora sei hein ministériu ida-idak mai tau fatin jogu nian ho fatin feira nian,” Prezidente Autoridade Munisípiu (PAM) Baukau, Olívio Freitas ba Timor Post iha nia kna’ar fatin Kuarta (17/11/2021).
Olívio husu ba populasaun tomak liuliu Baukau oan sira atu partisipa iha selebrasaun loron istóriku ida ne’e.
“Ita nia bainaka sira ne’ebé mai envolve iha serimónia isar bandeira mai husi nivel territóriu Timor laran tomak iha 12 munisípiu, órgaun soberanu haat, ho ita nia embaixada internasionál ne’ebé hela iha ita nia rain,” Olívio hatete.
Iha tempu hanesan presidente sub-komisaun organizadora munisípiu Baukau Agostinho P. Guterres hatete, fatin serimónia hala’o iha areador besik ektare neen.
“Tanba tuir ami nia planu atu konvida ita nia komunidade no konvidadus seluk husi munisípiu ho postu administrativu ita target ema na’in-rihun-tolu, ita la sura konvidadu sira mai husi nasionál, ne’e kompeténsia KO nasional nian,” Agostinho hatete.
Tuir observasaun jornalista nian nota katak kada komisaun ida-idak tur la hakmatek iha terenu hodi halo preparasaun, inklui grupu isar bandeira oinsá lori susesu ba serimónia loron proklamasaun independénsia ninian.
622 total views, 6 views today






