Dili (Timor Post) – Nasoins Unidas – Programa Ai-han Mundial (PAM) simu kontribuisaun jenerozu millaun $1 Dolar Amerikanu husi Governu Xina ba asisténsia ai-han emerjénsia ba inan isin-rua no inan fó susu iha Timor-Leste ne’ebé sofre ba malnutrisaun.
Komunikadu ba imprensa ne’ebé Timor Post asesu haktuir, kontribuisaun ne’e sei utiliza hodi fornese ai-han nutritivo hamutuk tonelada 548 ba inan isin-rua no inan fó susu hamutuk 12,000 resin atu konsumu kada fulan durante fulan 12. Fundu ida ne’e sei uza atu fornese ai-han suplementu hodi prevene kazu malnutrisaun, ho objetivu atu redús númeru mortalidade liu-liu ba inan sira mak iha risku aas no sofre ba malnutrisaun, liu husi fó suplementu mikronutriente ba sira.
“Akordu kontribuisaun entre Governu Repúblika Popular Xina no Governu Timor-Leste liu husi PAM mai iha tempu ne’ebé ita presiza duni atu fó apoiu ba ita nia ema. Tanba ne’e, hodi inan isin-rua no inan fó susu sira iha Timor-Leste nia naran, ha’u hakarak hato’o agradese ua’in ba suporta no kometimentu jenerozu husi Governu Xina,” Ministra Saúde Timor-Leste, Odete Maria Freitas Belo iha serimónia lansamentu ba akordu kontribuisaun entre Governu Xina no Program Ai-han Mundial (PAM) iha Palacio da Cinzas, Kaikoli, Dili, iha loron 28 Outubru 2021.
Iha Timor-Leste, problema seguransa ai-han no malnutrisaun kontinua sai dezafiu bo’ot, populasaun liu 1/3 mak sofre ba inseguransa ai-han. Labarik tinan 5 mai kraik hamutuk 47% mak nia altura la tuir nia idade, 8.6% krekas, no isin ki’ik ka todan menus hamutuk 32%. Inan ho idade reprodutiva sira hamutuk 30% maka sofre ba anemia.
Impaktu husi surtu COVID-19 no inundasaun iha fulan Abril afeta seguransa ai-han no nutrisaun iha territóriu laran tomak, kauza refere fó impaktu ba ema nia moris loron-loron, afeta mós korrente fornesimentu no funsionamentu merkadoria. Ezemplu, uma kain hamutuk 38% mak minimiza sira nia dieta nutritivo, ho razaun tanba osan no rekursu laiha, no tuir rezultadu asesmentu sósiu-ekonomia ne’ebé relata husi Governu Timor-Leste katak ema balun mós la konsege han pelumenus loron ida dala tolu.
“PAM orgullu ho kontribuisaun jenerozu husi Xina. Asisténsia ai-han, inklui asisténsia saúde komunidade no servisu nutrisaun, sei ajuda hakotu síkulu interjenerasionál,” hatete Dageng Liu Reprezentante PAM iha Timor-Leste.
“Ha’u kontente lansa programa ida ne’e hamutuk ho PAM no Ministériu Saúde. Xina sempre disponivel atu haforsa koordenasaun no parseria servisu hamutuk ho ONU no ajuda Timor-Leste hodi atinji Objetivu Dezenvolvimentu Sustentável 2030 atu hakotu hamlaha no halo transformasaun ba sistema ai-han,” hateten Embaixadór Xina Dr. Xiao Jianguo.
Fundu husi Governu Xina, liu husi the South-South Cooperation Assistance Fund (SSCAF) sei fó biban ba PAM atu hola super cereal – ai-han ne’ebé – fortifika ho vitamina no mineral. Ai-han nutritivo ne’e sei distribui liu husi Ministériu Saúde no servisu hamutuk ho SAMES (Servisu Autónomo de Medicamento e Equipamento de Saúde) ba iha munisipiu 12, inklui RAEOA-Oecusse. (cao)
1,822 total views, 6 views today
Bele hare Video Seluk :
Subscribe to Timorpost
