Jornalista Jaime Pires / Editór Noémio Falcão
DILI (Timor Post)—Deputadu husi bankada KHUNTO atual Vise Prezidente Parlamentu Nasionál, Luis Roberto lamenta tebes ho governu to’o agora seidauk selu subsídiu ekipa liña frente sira ba atake moras daet COVID-19.
Luis Roberto nia intervensaun iha diskusaun ba pedidu Prezidente Repúblika Francisco Guterres Lú Olo husu Parlamentu Nasionál atu aprova deklarasaun estadu emerjénsia ba dala-19, husu atu governu liuliu Ministériu Finansas aselera prosesu pagamentu.
“Ami triste tanba governu seidauk selu subsídiu ba ita nia ema sira ne’ebé mak servisu iha frontline sira,” reprejentante povu ne’e hatete iha plenária ne’ebé hala’o iha loron Tersa (26/10/2021).
Nia dehan, durante peiodu COVID-19, ema sira ne’ebé mak servisu maka’as iha liña oin mak hanesan, ekipa saúde, PNTL, F-FDTL no mós mídia sira liuhusi jornalista sira.
“Durante ne’e sira mak dedika sira nia-an tomak hodi kombate virus COVID-19 ninia iha Timor-Leste laran tomak,” nia hatutan.
Entretantu hafoin debate, Parlamentu Nasionál kontinua aprova pedidu deklarasaun estadu emerjénsia ba-dala-19 ne’ebé governu rekomenda no Prezidente Repúblika husu ba órgaun lejislativa.
Rejultadu votasaun ba pedidu ne’e, a favor 43, kontra 5 no abstensaun 12.
Estadu emerjénsia ba-dala-19 iha territóriu nasionál ho durasaun loron 30, hahú loron 30 fulan Outubru to’o loron 28 fulan Novembru 2021.
281 total views, 3 views today
