Jornalista Jaime Pires – Estajiáriu MJ10 / Editór Noémio Falcão
DILI (Timor Post)— Prezidente Kâmara Komérsiu no Indústria Timor-Leste (CCI-TL sigla Portugés), Oscar Lima husu ba governu fó prioridade ba emprezariu timoroan sira atu labele lakon iha kompetisaun.
Ba Jornalista sira hafoin enkontru ho Ministériu Koordenador Assuntu Ekonomiku (MKAE), iha Hotel Novu Turizmu, Lesidere-Dili, Sesta (22/10/2021) Oscar subliña, enkontru ho MKAE ko’alia kona-ba adezaun Organizasaun Mundial Komersiu (OMK).
“Governu tenke kria kondisoens, tenke fó prioridade ba ami emprezadus timoroan sira atu preparadu treinamentu kuandu aban bairua ita tama ba ne’e ita labele lakon, sei la’e ita selu kouta saugati de’it,” Oscar hatutan.
Oscar husu governu atu kontrola ema estranjeiru sira loke negosiu sira hanesan fa’an martabak, suku ropa no seluk tan iha rai laran.
“Ita nia emprezariu nasionál ne’e la tahan atu enfrenta iha terenu, kios ki’ikoan sira ne’e fó hotu ba sira, tanba ida ne’e mak ha’u la konkorda, to’o ne’ebé ha’u sei ko’alia enkuantu ha’u sei Prezidente,” Oscar afirma.
Nia reforsa, emprezariu Timor barak mak sedauk iha kapasidade atu kompete ho negosiante estranjeiru sira.
Nia fiar katak emprezariu timoroan sira sei la husu osan ba governu maibé importante liu maka kria kondisaun.
Iha fatin hanesan, Assesor Ministru Kodernador Asuntu Ekonomi (MKAE) Estanislau Aleixo da Silva hatete, advokasaun halo tratamentu tuir regulamentu Organizasaun Mundial Komersiu (OMK) ba Komersiu Industria fundamental.
“Instituisaun servisu advokasia edukasiunal ho tan buat seluk ne’ebé halo negosio ita halo tratamentu regras Organizasaun Mundial Komersial industrial fundamental katak, trasferénsia fundamental no tratamentu vigór prosesu sira ne’e uluk ami hahú haree ba importansia,” nia salienta.
Nia dehan, prosesu sira nee la’o tempu naruk tanba ne’e servisu sira ne’e ekipa husi WFP ho ONC hala’o hela no relasaun di’ak ho Sekretáriu ONC no mos kulsuta ho pais barak iha Amérika, Japaun, Kánada Austrália, Nova Zelándia no Uniau Europea.
997 total views, 3 views today
Bele hare Video Seluk :