AINARO (Timor Post)—Prezidente Comite 12 Novembro, Gregorio Saldanha “Mouris”, offisialmente inaugura monumentu ba Saudoza Eulália de Jesus Araújo, Sábadu (16/10/21) iha Ainaru Villa.
Saudoza Eulália nu’udar mos eroina ne’ebé mate iha inimigu nia liman iha Masakre Santa Kruz, 12 Novembru 1991.
Iha serimónia inaugurasaun, Gregório hato’o uluk saudasaun ho respeitu ba autoridade, família hotu iha Ainaro tanba hahoris no oferese Saudoza Eulália hamutuk ho timoroan seluk luta ba libertasaun nasionál.
“Sira fó sira nia a’an ba mate mak ikus mai povu no rai ne’e hetan liberdade,” Gregório subliña iha nia intervensaun.
Gregório mós temi naran seluk nu’udar Ainaro-oan ne’ebé rejiste hahú kedas iha loron 7 Dezembru 1975 invazaun Indonézia, militár sira oho inklui Komandante Sarjentu Fernando Carmo, Komandante Venáncio Feráz, Lorico no as’wain seluk ne’ebé ho Eulália mate iha Santa Kruz hanesan Abel Ramos ho “Alvaro Rebelo Perreira “Manecas”.
Nia hatutan, as’wain sira ne’e hamutuk ho sira seluk ne’ebé mate iha Timor-Leste laran tomak, mate hanesan komandante ka as’wain, mate hanesan povu babain vítima, sira sai hanesan aliserse no estrumentu ba RDTL no nia independénsia nasionál.
Gregório husu atu timoroan hotu ne’ebé maka sei moris, iha obrigasaun atu reza nafatin, kuidadu, estima no serbisu maka’as hodi fó valor ba as’wain sira nia luta.
Entretantu Gregório mos husu ba governu ne’ebé ukun, iha obrigasaun atu halo serbisu lolós no lalais hodi produz obra ho kualidade.
“Ohin ita ukun’an tinan 20 ona, buat balu governu sira be ukun halo ona, maibé sira tenke halo tan no hadi’a nafatin buat sira iha area saúde, edukasaun, uma ba povu, estrada, ahi no bé moos,” Gregório subliña.
Komité 12 Novembru mos durante ne’e halo servisu maka’as hamutuk ho governu harii dadauk monmentu Masakre Santa Kruz iha simitériu Santa Kruz, Dili.
“Saudosa Eulalia nia monumentu ho monumentu sira seluk tenki representa ita nia valor kultura no fiar ba Maromak nian, valor sira ne’e maka sei eduka no inspira ema seluk, liu-liu joven sira bainhira mai hare’e monumentu hanesan objetu istóriku ida,” Gregório hatete.
Nia husu inan feton no joven sira tenki orgullu tanba alin Eulalia hatudu nia eruizmu ka nia brani hanesan feto as’wain bainhira nia kaer fatuk hakilar hasoru militar Indonésia sira ho kilat iha rate Santa Kruz.
Nia hatutan, hanesan ejisti antes ona no husu nafatin governu atu halo aproximasaun intesnsivu no sériu ho governu Indonézia, aproveita maun boot Xanana, maun Taur, maun Lere ho maun sira seluk nia relasaun pesoál di’ak “ho eis-militares Indonésia sira hodi hatudu ita nia as’wain sira nia ruin, hahú husi saudozu Nicolau Lobato too sira ne’ebé mate no lakon iha 1999 inklui seluk iha Masakre Santa Kruz 1991.
Observasaun Timor Post iha terenu haktuir, iha eventu inaugurasaun ne’e marka prejensa husi Adjunta Administrador Munisípiu Ainaro ho estrutura, família no kolega Saudoza Eulália. Pg1& Pg4
824 total views, 3 views today
Bele hare Video Seluk :