DILI (Timor Post)—Primeiru Ministru Taur Matan Ruak subliña, difinisaun luta hodi lori susesu ba nasaun, iha mundu laiha ema ida mesak mak hala’o servisu ida ne’e. Nia dehan, atu atinji objetivu ida presiza ema hotu servisu hamutuk.
Taur fó ezemplu, iha uma kain ida presiza ema hotu iha uma ne’e halo servisu hamutuk, balu ba hili ain, kuru bee, buka osan, tein mak foin haan hamutuk. Katak, sé la servisu hamutuk maka sei la atinji buat ida.
“Labele dehan ema ne’ebé ba servisu maka vale de’it, iha uma la servisu karik sei hasoru hamlaha no problema oioin,” Taur subliña kestaun ne’e bainhira tún direta ba halo kampaña vasinasaun COVID-19 iha Postu Administrativu Hatulia, Munisípiu Ermera, Tersa (12/10/2021).
Taur dehan, luta kontra moras daet COVID-19 presiza sidadaun hotu nia kontribuisaun tanba governu ka pesoal ida mesak sei labele lori susesu ba nasaun.
Nia hatutan, moras daet COVID-19 la’ós ita Timor Leste de’it, iha nasaun hotu iha mundu la’ós ukun na’in de’it mak halo servisu maibé sidadaun hotu luta hasoru liuhusi kumpri regra saúde públiku hodi tesi kotu transmisaun boot liu tan.
Iha oportunidade, Taur kontinua husu ba sidadaun hotu atu vasina nu’udar meius di’akliu ba kontra moras daet COVID-19.
Taur husu atu lalika fir rumoris sira kona-ba vasina hamate ema.
Entretantu Taur mos husu ba inan-aman sira dudu oan ba eskola, tanba durante luta ba libertasaun nasionál mehi boot maka kaer kuda talin rasik maibé bainhira la matenek susar ba futuru nasaun. (cao)
772 total views, 3 views today
