DILI (Timor Post)—Durante Autoridade Inspesaun, Fiskalizasaun ba Atividade Ekonómika, Sanitaria no Alimentár (AIFAESA) tun ba halo fiskalizasaun iha armazen, identifika foos ho marka MTCI ne’ebé aat iha Sentru Lojístika Nasionál (CLN).
Diretór Operasaun AIFAESA, Gabriel da Costa, hatete, nia parte koordena ona ho CLN hodi hasai foos ne’ebé aat husi armazen.
“Ita haree foos balun ladi’ak ona, ita haruka hasai para labele kontinua fornese,” nia informa ba Timor Post, iha nia knar fatin Matadouru, Sesta (01/10).
Portantu, AIFAESA servisu hamutuk ho CLN, para bele halo destruisaun tiha foos balun ne’ebé aat ne’e, mais to’o agora seidauk identifika foos CLN ho marka MTCI at, ne’e laiha. Maibé kuandu komunidade ruma mak keixa kona-ba foos governu nian ladi’ak, sira tenke identifika at iha ka lae.
“Mais to’o agora laiha informasaun kona ba ida ne’e, ami sempre tun ba haree, foti amostra, kuandu nia kualidade ladi’ak, ami hasai,” nia hatete.
Normalmente, nia dehan, tenke hetan informasaun husi komunidade sira, depois husi armazein CLN rasik atu halo distribuisaun sempre konvida AIFAESA para bele haree, tanba atu distribui presiza check fila fali foos sira ne’e, iha duni at ka lae.
Diretór operasionál ne’e hatete, AIFAESA servisu hamutuk ho Departamentu Metrolójia atu bele haree kualidade ai han.
“AIFAESA seidauk simu informasaun kona ba foos ne’ebé aat, maibé kuandu komunidade no konsumidór sira mak kestiona kona ba ida ne’e, bele informa mai AIFAESA,” nia sujere.
Kuandu iha keixa ruma no bazeia ba keixa ne’e, AIFAESA sei halo koordenasaun ho parte CLN para bele observa iha fatin armazein, haree tok foos ne’ebé aat, karik at duni, labele distribui ba komunidade sira.
Portantu, foin lalais AIFAESA halo destruisaun iha lixeira Tibar foos saku 305 tanba aat ona.
Kona ba presu foos iha merkadu, nia dehan, AIFAESA liuhusi departamentu operasaun halo nafatin operasaun no observa direita iha tereñu, haree katak foos sira ne’e kontinua fa’an ho presu normal. (61L)
805 total views, 6 views today
