DILI (Timor Post)—Uniaun Europeia (UE), apoiu orsamentu ho montante dollar rihun limanulu ($50.000) ba Organizasaun Mundiál Saúde (OMS) hodi prepara kontentór ida, hodi modifika sai hanesan fatin mahon ba família pasiente Covid-19 hodi deskansa.
Reprezenta OMS iha Timor-Leste Arvind Mathur, hatete izolamentu entre Vera- Cruz no Lahane, maibé Lahane mak identifika sai hanesan izolamentu ba pasiente ho kondisaun grave. Tanba ne’e OMS hamutuk ho MS identifika hodi hasa’e kapasidade fasilidade.
“Ita hatene izolamentu Lahane kategoria ICU ba pasiente, entaun ita presiza tebes kria kondisaun ba sira nia família, nune’e hamenus risku tranzmisaun Covid-19. Enkuantu uma deskansa ba família kompostu hosi kama ida ema na’in rua, nune’e kama 4 maibé iha ema na’in ualu mak sei deskansa no armáriu”, Arvind Mathur ba Timor Post, hafoin partisipa lansamentu uma deskansa iha izolamentu Lahane, Sesta (01/10).
Nia esplika, preparasaun ba instalasaun uma deskansa hosi OMS, maibé apoiu fundus hosi Uniaun Europeia, maibé iha tan fundu hosi UE atu konstrui tan fatin ICU ba iha hospital referral lima, kompostu hosi Baukau, Maliana, Covalima no Maubise inklui RAEOA.
Enkuantu, Ministra Saúde, Odete Maria Freitas Belo, hatete Covid-19 hela hamutuk ona ho povu TL, tinan naruk ona no laiha serteza, katak bainhira mak Covid-19 lakon.
“Ita halo tratamentu ba pasiente Covid-19 tenke ho espesífiku uitoan, maibé ita mós halo prevensaun ba pasiente nia família nune’e labele hetan tranzmisaun Covid-19, maibé ho fasilidade ne’ebé UE ho OMS apoiu ita, nune’e ita pasiente nia família bele dook hosi sira nune’e evita tranzmisaun”, Odete subliña.
Governante ne’e argument katak, virus nia karakter família ida hetan moras todan no halo stress no presiza família tenke hakbesik, maibé moras ne’e rasik ema nia saúde dehan labele besik.
“Problema ita nia kultura ne’ebé família ida tenke hakbesik ba moras, entaun ita nia parseiru sira la taka matan, parseiru sira mós komprende ita nia kultura nune’e sira mós prepara konstrusaun ruma ba ita nia família. Tanba ne’e ba ha’u haree ajuda ida ne’e hanesan liu ona saida mak sira ajuda”, Odete dehan.
Ajuda hosi parseiru sira ho objetivu atu bele hakotu tranzmisaun Covid-19 iha TL, liuhosi fatin ne’ebé tratamentu ba pasiente sira.
Tanba ne’e ho apoiu ne’ebé iha, MS iha mós orsamentu atu kria fasilidade, maibé parseiru sira iha no prontu atu apoiu.(res)
1,005 total views, 3 views today
Bele hare Video Seluk :
Subscribe to Timorpost
