Estajiáriu MJ2 / Editór Noémio Falcão
DILI (Timor Post)—Diretór Sentru Peskiza Institute of Bussiness (IOB), Juliavo Xavier, hakerek no lansa tiha ona livru peskiza espesífiku ne’ebé ko’alia kona-ba modelu dezenvolvimentu turizmu iha illa Ataúro.
Livru ho pájina liu 100 ne’e lansa iha selebrasaun loron mundial turizmu ne’ebé monu iha loron 24 setembru iha IOB, Dili.
Livru ne’e sei entrega ba Ministériu Turizmu Komérsiu no Indústria (MTKI), setór privadu hodi sai hanesan referénsia ida no fahe mos ba estudante sira sai hanesan materiá aprendijajen.
Seremónia ne’e partesipa hosi eis Prezidente Repúblika, José Manuél Ramos Horta no Fundadór IOB, Abel Larisina.
Iha selebrasaun loron mundiál turizmu ne’e MTKI hamutuk ho IOB organiza semináriu hodi ko’alia kona-ba turizmu tranformativu, sustentável no inkluzivu.
Vise-Ministra Turizmu, Komunitária no Kultura, Inâcia da Conceição Teixeira, subliña, parte hotu hakarak iha mekanizmu dezenvolve transformasaun inkluzivu turizmu iha Timor-Leste ho ninian sustentabilidade ba futuru.
“Ministériu Turizmu koopera hamutuk ho setór privadu no akadémiku atu dezenvolve turizmu Timor-Leste, tanba papél akademia ne’e importante tebes,” Vise-Ministra subliña iha nia intervensaun iha sermináriu ne’ebé hala’o iha salaun plaza IOB.
Nia dehan, pandemia ne’ebé akontese halo setór turizmu hetan impaktu maka’as, barak lakon serbisu, taka atividade negósiu, maibé balun sei sobrevive ho atividade ekonómika iha situasaun ne’e.
“Karik ita implenta turizmu inkluzivu, ha’u fiar ita bele rekupera ita-nia setór turizmu iha Timor-Leste,” governante ne’e salienta.
736 total views, 3 views today
Bele hare Video Seluk :