DILI (Timor Post)—Aprovasaun ba Projetu Lei Nú.29/V(3a) Lei Protesaun ba Labarik no Foin Sa’e iha Perigu, iha Parlamentu Nasionál, tuir JSMP nia haree iha vantajen boot ba direitu labarik sira.
Diretora Exekutive Programa Monitorizasaun no Sistema Judisiál (JSMP), Ana Paula Marçal, hatete vantajen husi ne’e hanesan elementu save ida oinsá mak atu bele asegura ezersisu ba labarik sira.
“ita espera katak ida ne’e nu’udar elementu save ida atu oinsá bele asegura exersisu ba labarik sira no mós liu-liu ba iha direitu labarik fundamental sira”, nia dehan, ba Timor Post iha nia knar Fatin, Sesta (24/09).
JSMP hanoin katak husi lei ne’e bele garantia liu-liu ba direitu labarik sira nian no goza sira nia moris nu’udar sidadaun ida iha nasaun ne’e.
Tuir JSMP, Lei ne’e bele kobre ona saida mak durante ne’e, labarik sira no foinsae presiza iha sira nia moris, iha estrutura foun direitu fundamental, direitu fundamental mak hanesan direitu ba moris, nasionalidade asesu ba justisa no buat seluk tan.
Iha fatin seluk, Diretora provedória Direitus Umanus no Justisa, Jesuina Maria Ferreira Gomes (PDHJ), hatete lei ba protesaun ne’e importante hodi hetan ho forma adekuada ba protesaun ba labarik no koñesimentu husi dispozisaun konstitusionál ne’ebé orden jurídika Timorense.
Lei ne’e nia vantajen maka labarik ka joven mós protejidu husi violasaun oin-oin ne’ebé previstu iha kódigu penál Timor-Leste hanesan maus tratus ba menór; espozisaun ka abandona, infanstisidu no pornografia infantíl.
PDHJ fiar projetu lei ne’e bele engloba protesaun nesesária ba promosaun direitu no protesaun ba labarik no joven sira iha perigu, forma atu garante bein-estar no dezenvolvimentu integral labarik no joven sira iha Timor-Leste. (mj2)
669 total views, 3 views today
