Estajiáriu MJ7 / Editór Noémio Falcão
DILI (Timor Post)—Governu liuhusi Sekretáriu Estadu Protesaun Sivíl (SEPS) hahú ona halo identifikasaun ba fatin sira risku dezastre naturál hodi antisipa ameasa fenómena La Nina ne’ebé bele provoka udan boot iha fulan Outubru 2021 to’o 2022.
SEPS mos prepara tiha ona fatin ba evakuasaun komunidade sira ne’ebé bele afeta dezastre naturál iha territóriu liuliu iha Dili.
Sekretáriu Estadu Protesaun Sivíl, Joaquim Gusmão Reis Martins haktuir, nia parte halo mos sosializasaun ba komunidade sira liuliu iha fatin risku ba dezastre atu tau atensaun maka’as ba sira nia seguransa vida umana.
“Ita komesa halo ona sosializasaun ba fatin ne’ebé identifika risku dezastre hanesan mota ninin, foho lolo. Ita fó hanoin ba sira agora komesa halo aproximasaun ba fatin ne’ebé sai hanesan sentru evakuasaun karik akontese dezastre iha fulan Outubru,” Governante ne’e subliña ba Jornalista sira iha Salaun Delta Nova, Dili, Kuarta (22/09/2021), relasiona ho predisaun metodolojia husi Austrália no Estadus Unidus Amérika (EUA) katak hahú fulan Outubru to’o tinan oin sei akontese fenómena La Nina iha territóriu Timor Leste.
Joaquim mos dehan, nia parte halo ona koordenasaun ho parseiru nasionál no internasionál sira husi Austrália no Amérka no sira seluk. Nune’e mós Ministériu Transporte no Komunikasaun, no telekomunikasaun sira iha Timor Leste, diresaun nasionál metodolojia, jeofízika hodi alerta informasaun ba komunidade sira hotu.
Nia dehan, preparasaun hotu sei servisu hamutuk ho di’ak liu atu nune’e salva lalais komunidade sira husi risku ba sira nia vida. (Lee notísia seluk iha Jornal Timor Post)
1,415 total views, 3 views today
Bele hare Video Seluk :