Jornalista Cesário José de Sousa / Editór Noémio Falcão
DILI (Timor Post)—Governu lideradu Primeiru Ministru Taur Matan Ruak liuhusi Ministru Koordenadór Assuntu Ekonomia (MKAE), Joaquim Amaral hatete, nia parte konsidera predisaun metereolojia Austrália no Estadu Unidus Amérika (EUA) kona-ba ameasa La Nina iha Timor Leste hahú fulan Outubru 2021 to’o 2021.
Tanba ne’e, Ministru Joaquim dehan, nia parte ho apoiu internasionál sira preparadu hodi responde vítima sira bainhira akontese duni fenómena La Nina hodi hamosu inundasaun iha rai laran.
Governante ne’e hatete, apoiu husi governu Japaun liuhusi Work Food Programme (WFP) sei responde ba kestaun hirak ne’e. Liuliu ba iha dezastre naturál no situasaun seluk ne’ebé sei mosu.
“Preparasaun ne’ebé ita bele halo mak seguransa ai-han. Iha momentu ne’ebé situasaun difisil, seguransa ai-han ne’e importante, atu ajénsia sira ida-idak halo ninia funsaun no protesaun sivíl sira bele hala’o evakuasaun,” Ministru Joaquim ba Jornalista sira hafoin partisipa iha serimónia apoiu fundu ba seguransa ai-han mundiál iha Otél Timor, Tersa (21/09/2021).
Entretantu, Sekretáriu Estadu Protesaun Sivíl (SEPS), Joaquim José Gusmão dos Reis Martins, hatete daudaun ne’e hala’o hela liña koordenasaun ho ajénsia Organizasaun Nasaun Unidas (ONU) preparasaun hodi hasoru dezastre ne’e.
“Ita mós komesa halo ona sosializasaun ka alerta ba iha ita nia komunidade sira ne’ebé hela iha fatin risku dezastre sira ne’e, hanesan iha mota ninin, foho lolon inklui tasi ibun hodi kuidadu aan,” alerta Joaquim.
Daudaun ne’e, SEPS mós prepara hela atu halo restocking hahán no mós la’ós hahán bá munisípiu sira, tanba hanesan baibain restocking ne’ebé SEPS prepara hamutuk pakote 50, nune’e bele fó apoiu bá vítima sira ho lalais.
No antes ne’e, governu Japaun mós apoiu orsamentu ho total millaun $7.6 no sura hamutuk ho millaun $3, ne’e total montante ne’ebé apoiu ba programa ai-han mundiál millaun $10.6 inklui ho vasinasaun nian total hamutuk millaun $16.
Husi programa ne’e apoiu mós ba iha dezastre naturais ne’ebé sei mosu iha tempu tuir mai. (Lee notísia seluk iha Jornal Timor Post)
602 total views, 3 views today
