DILI (Timor Post)—Konsellu Ministru atribui podér tomak ba Ministru Transporte no Komunikasaun (MTK), José Agostinho da Silva atu asina akordu servisu aéro sira ho Brunei Darussalam.
“Konsellu Ministru fó podér ba senor Ministru Transporte no Komunikasaun, atu bele asina akordu servisu aviaun nian ho Governu Brunei Darussalam,” Ministru Prezidénsia Konsellu Ministru, Fidelis Leite Magalhães, informa hafoin remata reuniaun Konsellu Ministru, iha Ministériu Finansas, Kuarta (08/09).
Akordu ida-ne’e, ho objetivu atu impulsiona konetividade husi Timor-Leste no mundu tomak, no sei permite katak empreza servisu aéro sira ne’ebé dezigna husi nasaun rua, bele autoriza esplora servisu transporte aéreu nian husi país rua ne’e.
“Ho ida ne’e, ita sei iha ligasaun akordu kooperasaun ba iha servisu aéro entre Timor-Leste ho Brunei Darussalam, sei fasilita ita-nia ligasaun ne’ebé di’ak liután, se posivel bele iha ligasaun aviaun Royal Brunei, husi Brunei bele mai diretamente iha Timor no husi Timor ba Brunei,” Fidelis dehan. (jry)
937 total views, 3 views today
Bele hare Video Seluk :