DILI (Timor Post)—Iha tetu Orsamentu Jerál Estadu (OJE) ba tinan fiskal 2022, Ministériu Administrasaun Estatál (MAE) liuhusi Sekretariadu Tékniku Administrasaun Eleitorál (STAE), propoin orsamentu adisional millaun $9.3 hodi realiza Eleisaun Prezidensiál 2022.
Ministru Administrasaun Estatál, Miguel Pereira de Carvalho, hatete atividade prinsipál ne’ebé mak STAE sei halo iha tinan oin ligadu ho eleisaun prezidensiál, hanesan pontu importante tebe-tebes, tanba ne’e nia parte husu ba Komité Revizaun Orsamentu atu konsidera orsamentu refere, para STAE bele realiza eleisaun refere iha tinan oin, tantu iha rai laran no li’ur ho di’ak.
“Ministériu liuhusi STAE propoin orsamentu hamutuk millaun 9.3, para atu realiza eleisaun Prezidensiál iha tinan 2022 ba primeiru volta no mós segunda volta,” Miguel informa hafoin remata aprezentasaun programa no proposta orsamentu ministériu nian ba Komité Revizaun Polítika Orsamentu, iha Ministériu Finansas, Tersa (07/09).
Governante ne’e hateten, resenseamentu eleitorál no atualizasaun baze dadus ne’ebé mak STAE halo, too ohin loron rejista ona eleitores hamutuk 846. 352 iha Timor laran tomak no mós iha rai li’ur.
“STAE kontinua halo nafatin atividade resenseamentu eleitorál ne’e ate 15 Janeiru tinan oin, no ha’u fiar eleitóres sira sei aumenta tan iha tinan oin”, Miguel garante.
nia hateten, daudaun ne’e STAE mós halo rekrutamentu ba brigada sira ne’ebé mak sei responsavel ba kada sentru votasaun.
“Tinan oin ita prevee para atu kria sentru votasaun purvolta 1.200, ho estasaun votu purvolta 1.500, ida ne’e númeru ida ke natoon, para bele ajuda ita-nia eleitór sira hodi ba vota iha tempu pandemia COVID-19, ne’ebé mak ita hare ho situasaun ida agora parese bele prolonga to iha tinan oin, entaun ita tenke kria estasaun votu no sentru votasaun barak liután, para evita aglomerasaun iha loron eleisaun”. Miguel relata.
Miguel admite, STAE sei halo esforsu hotu, para atu garante katak iha estasaun votu no sentru votasaun sira, medida prevensaun ba moras COVID-19 sei aplika iha estasaun votu no sentru votasaun.
“STAE halo nia esforsu ida ne’e no entidade sira hanesan PNTL mós planeia sira nia orsamentu hodi fó apoiu seguransa ba eleisaun prezidensiál 2022, alende ne’e instituisaun seguransa sira seluk hanesan Forsa, planeia orsamentu para atu fó apoiu, no instituisaun autónomu sira hanesan Komisaun Nasionál Eleisaun sei propoin orsamentu ba Komité Revizaun Orsamentu para atu superviziona eleisaun tuir kompeténsia CNE nian,” Miguel subliña. (jry)
317 total views, 3 views today
