DILI (Timor Post)—Estadu Repúblika Popular Xina liuhusi nia embaixada iha Dili fó doasaun máskara hamutuk 240,000 no ekipamentu anti-epidemika sira seluk ba Ministériu Saúde Timor-Leste.
Serimónia entrega no simu ekiamentu sira ne’e hala’o iha loron 8 fulan Setembru 2021 iha Dili.
“Ida ne’e lote material anti-epidemika ba dala-13 ne’ebe mak doasaun husi Xina ba Timor-Leste, nomós hanesan doasaun ekipamentu protesaun individual ne’ebé ho kuantidade boot iha momentu ne’e,” Xiao Jianguo, Embaixador Xineza ba Timor-Leste subliña iha okajiaun.
Xiao dehan, Xina sempre preokupa no apoiu Timor-Leste nia luta hasoru COVID-19. Dezde epidemia surtu COVID-19 tinan kotuk, Xina mak primeiru lolo liman hodi ajuda Timor-Leste no nia mak primeiru haruka aviaun fretadu transporta ekipamentu médiku. Iha fulan Marsu tinan ida ne’e, transmisaun COVID-19 komesa ona espalla iha Timor-Leste. Iha fulan Abril, Xina oferece ho urjensia lote material anti-epidemika ida no ajuda dizastre hanesan reajente teste nian, roupa protesaun nian, termómetrus teste, sabaun herbal no lensol ba Timor-Leste.
Iha fulan Juñu , Xina oferese ona vasina Sinovac ho total dose 100,000. Agora dadaun, Virus Delta halo situasaun epidemika agravadu no Timor-Leste hasoru hela dezafiu foun. Ohin, Xina halo doasaun lote ekipamentu anti-epidemika ba Timor-Leste inklui maskara, luvas mediku, roupa protesaun no kapa sapatu. Ida ne mak doasaun Ekipamentu Protesaun Individual ho kuantidade boot ne’ebé oferese husi Xina. Xina ho Timor-Leste hanesan nasaun amigo. Bazeia ba kontextu komunidade mundial ho saúde ba ema htu , Xina sei kontinua oferese asistensia tuir nia abilidade hodi tulun Timor-Leste hasoru epidemia.
Entretantu Ministra Saúde, Odete Belo hatete, Variante Delta potensialmente lori fila fali Timor-Leste ba kotuk iha ne’ebé nia komesa luta hasoru epidemia, no fo ameasa ba Timor-Leste no nia emar sira. Agora sistema mediku iha nesesidade urgenti ba Ekipamentu Protesaun Individual no Xina oferese asistensia ho lalais tebes. Ministeriu Saúde hatoo agradese ba Xina ne’ebé sempre hamrik ho Timor-Leste no espera bele kopera liu tan ho Xina iha area mediku no kuidadu saúde.
Ekipamentu anti-epidemiku ne’ebé ajudu husi Xina iha momentu ne’e mak hanesan; maskara ho total 240,000, luvas mediku ho total 100,000, Roupa protesaun hamutuk 15,000 no kapa sapatu hamutuk 15,000. (*/cao)
278 total views, 3 views today
