DILI (Timor Post)—Ministériu Edukasaun, Juventude no Desportu (MEJD), ho Radio Televizaun Timor-Leste Empreza Públika (RTTL.E.P) renova akordu kona-ba programa eskola ba uma.
Diretór Jerál Planu Polítika no Inkluzaun MEJD, Odília das Dores Ung Martins, hatete hahú Pandemia Covid-19 tama iha Timor-Leste, MEJD ho RTTL.E.P servisu hamutuk kedas atu responde ba nesesidade ne’ebé labarik sira presiza atu tulun sira.
“Akordu iha ne’e halo iha tinan kotuk, ita tenke renova. Tanba ida ne’e mak ohin loron hamutuk fali ho RTTL.E.P iha fatin ida ne’e atu renova akordu hodi bele kontinua fó sai programa eskola ba uma atu bele responde ba nesesidade larak sira ho situasaun agora konfinamentu obrigatóriu,” nia hatete iha edifísiu RTTL.E.P Kaikoli, Tersa (31/08).
Nia dehan, MEJD deside programa eskola ba uma mak bele tulun labarik sira, signifika estudante iha uma de’it maibé kontinua estuda.
Nia informa, programa ida ne’e hanesan prosesu ida atu tulun labarik sira. tanba ne’e maka MEJD to’o ohin loron produz ona matéria to’o 202 episode maibé foin públika episode 135.
“Ha’u atu hatete agora daudauk MEJD prepara ona matéria sira atu halo eskola ba uma no mós tele-eskola hamutuk 202 episode, maibé agora 135 maka ita publika ona. Agora daudauk ami sei entrega tan episode 30 ba RTTL.E.P hodi bele responde ba nesesidade ne’ebé bele tulun labarik sira,” nia informa.
Dirijente MEJD ne’e la temi orsamentu hira mak aloka ba programa ida ne’e. Maibé informa MEJD sei ezekuta osan estadu. Tanba ne’e, kada televizaun MEJD selu rihun $2 to’o rihun $3.
“Ha’u hanoin programa ida ne’e agora daudauk ita sei utiliza orsamentu jerál estadu. Hanesan osan ne’ebé aloka ona kada episode sei selu kada televizaun $2 mil to’o $3 mil,” nia haktuir.
Iha fatin hanesan, Prezidente Radio Televizaun Timor-Leste Empreza Publika (RTTL.E.P), Jose Antonio Belo, hatete kooperasaun MEJD ho RTTL.E.PP la’ós foin maka hahú maibé hahú dezde 2016. Maibé ninia konteúdu balu presiza hadi’a tuir dekretu lei ne’ebé governu fó sai katak RTTL sai empreza publika.
“Haree ba ida ne’e, maka ami husu ba ministériu edukasaun atu bele hadi’a ninia konteúdu kontratu. Tanba RTTL sai hanesan empreza publika entaun RTTL.E.P tenke hatama reseita ba estadu no RTTL.E.P tenke kontribui nafatin ba iha polítika estadu nian maibé mós tenke hatama reseita,” nia dehan.
Tanba ne’e, RTTL. E.P nia labele kobre kustu hanesan ho estasaun privadu seluk maibé RTTL.E.P tenke hatete iha akordu katak iha kustu uitoan. Ezemplu hanesan estadu privadu sira rihun $800, maibé ba RTTL.E.P kada episode $200.
“Ami públika ona, agora hadi’a de’it maka kontratu. Lei ne’ebé governu halo ami tenke implementa maibé ami mós labele kobre kustu kompletu ba governu se de’it,” nia informa. (ono)
1,039 total views, 3 views today
