Jornalista Jaime Pires / Editór Noémio Falcão
DILI (Timor Post)—Xefe Bankada Kmanek Haburas Unidade Timor Oan (KHUNTO), Olinda Guterres husu ba governu tenke fó tan apoiu sesta bázika ba populasaun durante implementasaun Konfinamentu Obrigatóriu (KO).
Ba Timor Post via telefone, Segunda (30/08/2021), Olinda rekoñese povu barak maka susar tebes hetan aihan bainhira la sai husi uma ba servisu ka hala’o atividade sira ba sustenta moris lorloron. Tanba ne’e, nia husu governu tenke tau atensaun.
“Kuandu Governu fó ona serka sanitária no konfinamentu obrigatóriu, tenke kontinua fó sesta bázika, liuliu sira ne’ebé mak laiha ai-han ba sira nia uma laran,” reprejentante povu ne’e subliña.
“Dala ida tan bele fó serka sanitária komfinamentu obrigatóriu maibé governu tenke tau matan ba ita nia ema sira ne’e. Orsamentu ba ida ne’e ami aprova ona maibé governu mak tenke haree povu nia moris oinsá lorloron nian,” Olinda hatutan.
Governu no membru parlamentu kada fulan simu osan nesesidade la falta maibé ba povu ki’ik sira ne’ebé mak la hetan hahán loron ida dala tolu iha tempu komfinamentu obrigatóriu.
Deputada apoiu Governu ne’e subliña, aplika komfinamentu obrigatóriu jerál ne’e atu minimiza moras ne’ebé mak da’et maka’as iha territóriu laran tomak, maibé hanoin mós povu nia sofrimentu sira iha tempu ne’e.
“Ha’u haree ha’u nia matan kedas ha’u haree komfinamentu ne’e buat loos ida, governu aplika komfinamentu obrigatóriu jerál atu minimiza moras Delta ne’ebé mak iha Ermera-Dili nune’e ita kuandu fó ona serka sanitária komfinamentu obrigatóriu hanesan dadauk ne’e perigu tebetebes hodi apoiu ita nia povu nia vida,” Olinda hatete.
975 total views, 3 views today
Bele hare Video Seluk :
Subscribe to Timorpost
