DILI (Timor Post)—Governu Timor-Leste, simu tan vasina AstraZeneca (AZ), hamutuk Doze 168.000 kompleta ho saringa no algodaun hosi governu Japaun.
Asesór ba Relasaun Internasionál no Kooperasaun, Afonso H. Corte Real, hatete sasán hirak ne’e, governu Japaun apoiu liuhosi Fundu Covax ne’ebé fornese hosi UNICEF.
“Vasina Covid-19 hamutuk doze 168.000 ne’e apoiu hosi Japaun, ne’ebé liu-hosi Fasilidade COVAX Facility ne’ebé fornese hosi UNICE”, Afonso informa ba jornalista sira hafoin remata hatún vasina hosi Aviaun TRI. M.G Asia Airlines, iha Aeroportu internasionál Nikolau Lobato Komoro, Sesta (13/08).
Nia hatutan, vasinasaun ne ‘e sei fahe ba munisípiu hotu-hotu iha TL, maibé prioridade ba munisípiu haat ne’ebé mak hanesan area risku COVID-19, hanesan Baukau, Ermera, Vikeke no Covalima.
“Ita tau prioridade ba Munisípiu haat ne’e ho razaun katak, iha munisípiu hirak ne’ e, númeru Covid-19 sei aumenta”, nia argumenta.
Maibé nia dehan, agora daudaun governu halo hela esforsu atu fó vasina ba populasaun TL hodi alakansa to ‘o 70%, nune’e, to’o fulan Setembru 2021, situasaun ne’e bele fila fali ba normál.
Oportunidade hanesan, Embaixadór Japan iha TL, Masami Kinefuchi hatete, governu Japaun fó ona vasina liu-hosi Fundu Covax Facility. Tanba agora daudaun nasaun hotu iha mundu tenta hela atu luta hasoru Covid-19, inklui TL.
“Ha’u kontente tebes, tanba Governu Japaun ajuda ona vasina adisionál ba nasaun ida ne’e no ha’u hein katak asisténsia ne’e di’ak ba povu Timor-Leste”, Diplomata ne’e dehan.
Diplomata ne’e hatutan, vasina ne’e inisiativa hosi Primeiru Ministru Japaun nian atu ajuda povu TL. Tanba Inisiativa ne ‘e hetan anunsia hosi Primeiru-Ministru Japaun iha fulan Jullu liubá atu fó doasaun orsamentu ho montante biliaun $1 ba Fasilidade Covax Facility.
“Ha’ u hein katak kontribuisaun ne ‘e bele ajuda ema hotu iha mundu, inklui mós komunidade TL”, nia espera.
Nia esplika, COVAX facility koopera ho nasaun barak, inklui Japaun, hodi ajuda fó vasina ba mundu no Japaun hanesan doadór boot ida iha COVAX facility. (res)
997 total views, 6 views today
Bele hare Video Seluk :