Jornalista Jaime Pires / Editór Noémio Falcão
DILI (Timor Post)—Timoroan na’in-113 nu’udar membru arte marsiál Persaudaran Setia Hati Terate (PSHT), ne’ebé Polísia Repúblika Indonézia (POLRI) kaptura iha Atambua iha semana kotuk deportadu no kumpri kuarentena iha rai laran.
Hafoin kumpri kuarentena, autoridade migrasaun prega multa ba sidadaun hirak ne’e kada ema $250, sura hamutuk ema na’in-113 totál osan $28.250.
Regra hirak ne’e aplika tanba sidadaun hirak ne’e ilegalmente ultrapasa fronteira ho objetivu ba hasa’e sintu ka sabuk iha Atambua. No hafoin kaptura, autoridade Repúblika Indonézia deporta mai Timor Leste iha loron Tersa (10/08/2021).
Ba Jornalista sira Diretór Jerál Servisu Imigrasaun, Luis Soares Barreto hatete, nia parte simu ona sidadaun hirak ne’e no hatama kedas kuarentena hodi prevene moras daet COVID-19 ho variante Delta.
“Depois kuarentena prosesu migrasaun nian sei halo prosesu administrativu ba sira hodi selu multa ba migrasaun nia no mós dekreutu lei estadu emerjénsia dekretu governu númeru 18/2021 ninia hodi fó sansaun multa ba sira,” Luis ba Jornalista sira iha nia servisu fatin, Vila-Verde, Kuarta (11/08/2021).
Nia aumenta, depois multa sira sei entrega fali ba iha polísia investigasaun nasionál hodi halo prosesu kontinuasaun ba asaun sira ne’ebé mak iha, ne’ebé kompetensia sei iha parte investigasaun mak sei halo prosesu kontinuasaun.
“Ami foti ona desizaun katak sei fó sansaun multa masimu ba sira, kada ema ida sei selu multa ba Imigrasaun ho dólar $250 entaun hamutuk 113 ne’e sei selu montante hamutuk dólar $28,250 sira selu mai governu liuhusi Imigrasaun”, Nia deklara.
Nia aumenta, fó sansaun todan ka selu montante boot tanba, Timor-Leste implementa estadu emerjénsia no iha parte fronteira sei locdown hela maibé sira ho ilegalmente sai ba Atambua entaun sira dezibedese ba desizaun governu ninia ne’ebé mak hasai ona liuhusi konsellu Ministru. (Lee notisia seluk iha Jornal Timor Post)
865 total views, 3 views today
Bele hare Video Seluk :