DILI (Timor Post)—Ministériu Obras Publika (MOP) hahú aprezenta mini komite revizaun Orsamentu Jerál Estadu (OJE) tinan 2022 ba instituisaun relevante sira, liuliu instituisaun autónomu sira.
Ministru Obras Publika, Salvador Eugenio dos Reis Pires, hatete iha OJE tinan 2022, tuir planu sei prevee millaun $90 ba Eletrisidade Timor Leste, Empreza Públika (EDTL,EP).
“Ba EDTL, ami nia planu millaun $90, ne’e ba kobre kombustivel no projetu seluk, klaru ke sira mós iha hela orsamentu ne’ebé atribuidu iha tinan ne’e balansu sira sei lori ba iha tinan aleinde ida ne’e sira mós rekolla reseita kada tinan 30 ital millaun,” informa Salvador iha Ótél JL Villa-Aimutin, Segunda (09/08).
Nia espera, tinan oin mai bele di’ak liu tan, tanba daudaun ne’e sira halo hela akizasaun 102 mill kontadór, ida instala hotu no kontrolu ba koneksaun ilegál sira inklui kliente sira ne’ebé seidauk simu kontadór.
Kuandu sira ne’e kobre hotu, tinan oin reseita bele kobre hotu, no orsamentu ne’ebé prevee husi MOP bele sustenta ona funsionamentu administrasaun empreza nian iha futuru mai.
Nia dehan, nune’e mós ba Bee Timor-Leste, Empreza Publika (BTL,EP), sei prevee $17 millaun. Tanba ne’e orsamentu sira ne’e sufisiente ona ba sira, aleinde ida ne’e governu iha orsamentu kontinjénsia karik iha nesesidade previstu ruma bele kobre iha ne’ebá.
Tanba ne’e, planu prioridade liuliu ba EDTL sei kontinua nafatin instalasaun ba kontadór, liña ilegál no seluk ne’ebé bele hasa’e rendimentu empreza nian iha futuru. (jho) Lee notísia seluk iha Jornál Timor Post
809 total views, 6 views today
