Jornalista Jaime Pires / Editór Noémio Falcão
DILI (Timor Post)—Polísia Nasionál Timor-Leste (PNTL) liuhusi Batallaun Órden Publika (BOP) no Kompañia Operasaun Espesial (COE sigla Portugués) kaptura tiha ona rede ne’ebé fasilita movimentu ilegál iha liña fronteira.
Rede ne’ebé kapturadu nu’udar joven membru Grupu Arte Marsiál (GAM) ne’ebé durante ne’e fasilita nia maluk sira ba hasa’e sintu iha Indonézia liuhusi fronteira terrestre.
Komandante Unidade Espesiál Polísia (UEP), Superintendente Xefe Polísia Orlando Gomes ba Jornalista sira iha nia kna’ar fatin Bairro-Pité, Dili haktuir, nia parte koloka tan membru COE ho BOP servisu espesífiku no vizilánsia maka’as apoiu UPF hodi asegura liña fronteira hosi movimentu illegal.
Joven mane ne’ebé kapturadu iha area fronteira ho naran inisial OdA, husi Aldeia Atus, Suku Gildapil Munisipiu Bobonaro.
Orlando hatete, joven mane ne’e tama ilegal ba Indonézia iha loron 2 Jullu 2021, lori mós ema na’in lima no nia mesak mak tama mai teritóriu nasionál iha loron 6 Agostu 2021 enkuantu nia maluk sira seluk sei iha hela Indonézia.
“Iha dia 7 agostu madrugada liubá BOP no COE halo kapturasaun ba ema nain 11 iha Suku Saburai hamutuk ho sidadaun Indonézia ida ne’ebé mak atu hakat fronteira ilegal ba Indonézia. Hafoin iha dia 8 agostu iha tuku 1 meiudia halo tán kapturasaun ba membru membru Grupu Arte Marsiál (GAM) na’in 1 iha Suku Memo hetan mós evidensia hanesan atributu arte marsiais husi PSHT ninian no ohin dader tuku 3 kaptura tan joven mane ida ne’ebé fasilita ona ema nain lima tama ilegal hodi hodi sa’e sabuk”, subliña.
Nia deklara, daudaun ne’e membru Grupu Arte Marsiais sira ne’e entrega ona ba Komandu PNTL Munisípiu Bobonaro hodi kontinua halo prosesu investigasaun hodi prosesa tuir lei ne’ebé vigora.
“Ita hatene katak moras ne’e agora dadaun aumenta ba bebeik liliu Covid variante delta ne’ebé komesa alastra ona iha ita-nia nasaun. Bazeia ba orientasaun husi komandu jerál ba ita –nia membru sira ne’ebé mak kolokadu ona iha fatin ne’ebá, sira iha estratéjia rasik servisu hamutuk entre PNTL BOP no COE atu bele halo kapturasaun ba ema sira ne’ebé maka tama ilegal”, nia hatutan.
Nia dehan, efetivus hosi BOP no COE sira sei servisu extraordinaria iha liña fronteira hotu hodi halo prevensaun ba pandemia Covid-19 variante foun ne’ebé hamate ona ema barak.
“Husi komandu UEP hato’o ona orientasaun ba COE no BOP servisu hamutuk ho komunidade sira aumezmu tempu husu ba komunidade sira iha fronteira atu servisu hamutuk ho membru sira hodi asegura no prevene ema labele hakur liu fronteira ho ilegalmente ba Indonézia, tanba ita hatene katak ita tenki asegura didi’ak ita-nia nasaun ne’ebé hari ho ran no ruin”, tenik tan.
Orlando haktuir, fronteiras terrestre ne’e hanesan fatin ne’e mak luan no presija apoiu hosi komunidade sira atu servisu hamutuk ho PNTL atu nune’e bele halo kapturasaun ba ema sira ne’ebé mak tama sai illegal.
893 total views, 3 views today
