DILI (Timor Post)—Sekretariadu tékniku administrasaun eleitorál (STAE), rekomenda ba eleitór sira atu bele hakbesik ba sentru atendimentu kartaun eleitorál, iha postu administrativu 65 iha territóriu nasionál.
Diretór jerál STAE, Acilino Manuel Branco, hateten atendimentu eleitór kontinua la’o, liu-liu iha munisípiu Baukau, Bobonaru no Dili ne’ebé ho populasaun barak.
“Importante mak ami hato’o mensajen ba ita nia sidadaun sira hotu bele hakbesik aan ba sentru atendimentu hamutuk 165 iha postu administrative sira,” informa Acilino ba Timor Post iha ninia knaar fatin, Kinta (05/08).
Nia esplika, atendimentu resenseamentu hetan partisipasaun makas iha postu administrative sira iha munisípiu Dili. Tanba loron ida bele atende too 200 eleitores.
Tanba eleitór foun ne’ebé foin atinje idade 16 barak mak mai halo rejistu, atu hetan kartaun eleitorál no barak mós mai atualiza sira ninia kartaun eleitorál.
Ho atendimentu ne’e hatudu progresu maibé hatete tiha ona katak, resenseamentu eleitorál CNE ho STAE lansa iha dia 1 fulan Jullu, sei atende too dia 14 fulan Janeiru 2022.
Tempu badak sei realiza atendimentu resenseamentu eleitorál iha estranjeiru hanesan, Australia, Inglaterra, Portugál no Korea inklui sira seluk tan.
Tanba ne’e, nia husu sidadaun timoroan sira iha estranjeiru atu partisipa iha resenseamentu eleitorál atu bele ezerse direitu votu iha eleisaun prezidensiál.
Atendimentu resenseamentu durante ne’e sempre hetan difikuldade, tanba preparasaun másimu, maibé la enfrenta difikuldade ne’ebé mak boot.
Rezultadu hatudu hosi atendimentu iha partisipasaun maka’as, nune’e mós atividade hirak ne’e la’ós atividade foun ba STAE. Nune’e mós atendimentu di’ak tebes.
Tanba nunka rejistu problema ruma, maibé la hatene atendimentu ba oin, koordenasaun ne’ebé mak di’ak ho parte hotu, espera no garantia katak to’o prosesu ne’e nia rohan sei la akontese problema ruma. (kyt)
1,214 total views, 3 views today
Bele hare Video Seluk :