DILI (Timor Post)—Impaktu hosi kestaun tékniku balun halo Tribunál Distritál Oekusi (TDO) suspende audiénsia julgamentu kazu Topu Honis ba fulan Setembru.
“Julgamentu ba kazu nee sei suspende ba loron 16 Setembru agora, hodi rona sasin sira nia deklarasaun,” dehan Advogadu Privadu Miguel Faria, ba Timor Post iha TDD, Kinta (05/08).
Nia hatete, tribunal rona hotu ona deklarasaun hosi arguidu, vítima no sasin balu maibé sei falta sasin kuaze na’in 50 hanesan ne’e mak tribunal seidauk rona sira nia deklarasaun.
Entretantu, advogadu nee hatete nia sei la halo esplikasaun kona-ba prosesu julgamentu, tanba prosesu ne’e sei taka ba públiku.
“Labele, ita labele kolia detallu kona-ba lala’ok prosesu, tanba sei iha faze segredu justisa, liuliu tipu kazu sira hanesan ne’e violasaun kontra labarik,” dehan tan.
Parte Sosiedade Sivíl, hanesan JSMP nafatin enkoraja parte tribunal no husu atu nafatin iha prinsípiu independente, hodi halo desizaun ida ne’ebé justu no adekuadu.
“Ba prosesu hosi inisiu JSMP nia ema mós halo akompañamentu, no observa direta nia prosesu, ita espera no husu atu tribunal nafatin firme iha prinsípiu independente, no espera iha desizaun ne’ebé adekuadu,” dehan Diretora Ezekutiva JSMP, Ana Paula Marçal ba Timor Post iha nia servisu fatin.
Diretora JSMP husu ba sosiedade, atu nafatin tau fiar iha tribunal no parte sira hanesan Ministeriu Públiku no defeza, atu foti desizaun sira ne’ebé adekuadu. (jxy)
851 total views, 3 views today
