DILI (Timor Post) —Komandante Tránzitu Rodaviariu Munisípiu Dili, Inspetór polisia Domingus Sarmento Gama, hatete motorizada prendidu hamutuk 200 resin maka entrega ona ba patrimóniu estadu.
Nia hatete, iha tinan ida ne’e, viatura hirak ne’e antes entrega ba patrimóniu estadu, polisia tránzitu hatama pedidu ba Ministériu Públiku no lori ba tribunal, hetan despaxu hodi entrega ba patrimóniu estadu.
“Hetan despaxu ida kuaze motorizada atus rua resin, maka ita fó ona ba estadu liuhosi patrimóniu estadu,” nia hatete iha knar fatin Kaikoli, Kinta (05/08).
“Motor hirak ne’e rai hosi 2007 no to’o mai 2021, balun iha kondisaun ladi’ak ona, balun sei di’ak,” nia hatutan.
Nia informa, atividade entrega motorizada prendidu sira ba patrimóniu estadu ne’e, polisia tránzitu munisípiu Dili sai hanesan ezemplu dahuluk, no iha nivel polisia tránzitu munisipál sira sei banati tuir ida ne’e.
“Dili sai ezemplu entaun munisípiu seluk mós hahú halo antes motor karreta dodok, mai foti formatu iha Dili, halo sira mós ba prosesa ba ida ne’e hanesan,” nia hatete.
Ikus liu, nia esplika, komunidade sira presiza hatene, katak viatura ne’ebé polisia sira prende, tuir lei hein to’o 80 diaz atu inflator sira mai foti, kuandu liuhosi loron 80 ne’e, sei entrega ba patrimóniu estadu.
“Katak tuir lei 80 Diaz transporte na’in tenke mai foti, maibé liu loron ida a-favór ona ba estadu, sai ona patrimóniu estadu,” nia hakotu. (ven)
914 total views, 3 views today
Bele hare Video Seluk :