DILI (Timor Post)—Estudante iha Universidade Nasionál Timor Lorosa’e (UNTL) fakuldade siénsia sosiais sente triste tanba la hetan subsídiu pulsa husi governu liuhusi ministériu ensinu superior, siénsia no kultura (MESSK).
Subsídiu ne’e MESSK asina ona akordu ho operadór telekomunikasaun tolu hanesan Timor Telekom, Telemor no Telkomsel iha fulan kotuk hodi transfere pulsa ba estudante universidade sira iha Timor kada fulan dolar $10.00.
Orsamentu ne’ebé governu aloka ba subsídiu pulsa ba estudante sira ho montante hamutuk Rihun $.64 resin no total estudante hamutuk 38.107. Husi númeru estudante ne’e fahe ba operadór telekomunikasaun tolu hanesan Timor Telekom hetan estudante rihun 9 resin, Telkomsel rihun 5 resin no Telemor rihun 23 resin.
“Ha’u rona kolega balu iha UNPAZ dehan pulsa tama ona, maibé ha’u rasik seidauk tama. Ida ne’e halo ha’u triste loos tanba ami la hetan subsídiu pulsa,” Estudante fakuldade siénsia sosiais, UNTL, Jacinto Amaral Soares hato’o ba Timor Post iha kampus UNTL Kaikoli Dili, Segunda (02/08).
Nia dehan, tuir loloos ministériu ensinu superior husu ba operadór telekomunikasaun tolu iha Timor-Leste atu transfere pulsa dala ida de’it labele balu hetan balu la hetan.
Iha sorin seluk estudante Izaías Agostu Freitas hatutan katak tuir promesa ne’ebé mak ita nia governu fó mai ami hatete katak ba estudante universitáriu sira sei hetan pulsa $. 10 dolar kada fulan maibé to’o ohin loron ami seidauk hetan.
Nia dehan, to’o ohin loron universidade seidauk hasai avizu katak bainhira mak tama fali prosesu aprendizajen prezensial tanba universidade balu tama ona.
“Ida ne’e hanesan diskriminasaun ba estudante tanba ita ko’alia kona-ba apoiu estudante. Estudante hotu iha Timor laran tenke hetan hotu, labele estudante balu mak hetan balu la hetan,” nia kestiona.
Nia hatutan, hanesan estudante sai vítima ba prosesu sira hanesan. Tanba la’ós ema ida rua mak iha direitu, ida ne’e governu tenke toma responsabilidade ba erru sira hanesan ne’e.
“Ami estudante sai vítima ba prosesu hanesan ne’e, kuandu labele fasilita ami estudante. Labele mai promesa kedas tanba ne’e sente hanesan insatisfasaun ba estudante,” nia hatete.
Kuandu la hetan pulsa ida ne’e prejudika estudante sira atu asesu matéria iha internet liuliu kona-ba prosesu aprendizajen online nian.
“Ha’u husu ba ministériu ensinu superior katak kuandu atu fasilita estudante sira presiza kria kondisaun hanesan labele halo fali separasaun katak estudante balu hetan balu la hetan ida ne’e diskriminasaun,” nia rekomenda.
Reitór Universidade da Paz Adolmando Soares Amaral hatete, subsídiu pulsa ba estudante universidade sira governu asina ona akordu ho operadór telekomunikasaun tolu iha Timor-Leste no agora estudante balu hetan ona pulsa.
“Mekanizmu sira hotu ne’ebé mak sira hotu ami haruka ona. Maibé transferénsia ne’e haruka direita ba estudante sira nia númeru kontaktu,” nia hatete.
Reitór UNPAZ hatete, estudante balu simu ona subsídiu pulsa internet maibé governu tenke kontrola mós operadór sira atu garante liña internet ho di’ak labele la’o hakdasak hanesan agora. Kuandu nia velosidade nafatin hanesan agora entaun operadór mak di’ak tanba hetan osan. Estudante mak lakon tanba atu asesu liña internet la’o atraza.
“Ha’u nia hanoin depois sira asesu ba subsídiu pulsa internet operadór sira mak tenke garante ba sira kona-ba liña internet para la’o labele hakdasak demais. Depois ninia velosidade tenke aumenta tan para depois estudante bele asesu di’ak ba aprendizajen online,” nia rekomenda.
“Ita husu para governu aperta operadór telekomunikasaun sira para depois aumenta velosidade ba liña internet no garante katak estudante sira laiha problema ho liña tanba velosidade ne’ebé la’o hakdasak estudante sira mak foti risku operadór di’ak hetan osan,” nia hatete.
Nia informa total estudante iha universidade da Paz ne’ebé mak asesu ba subsídiu pulsa tuir lista ne’ebé mak ami haruka ba ministériu ensinu superior hamutuk 9176.
Vice reitór I asuntu akadémiku Institutu of Business (IOB), Antonio Soares Martins, haktuir instituisaun hatama ona dadus no agora estudante balun simu ona pulsa dolar $5.
“Ha’u simu ona informasaun husi ami nia grupu WA katak sira nia pulsa tama ona $5 sei uza durante loron 15,” nia informa.
Entretantu, Timor Post asesu informasaun husi estudante universidade UNPAZ, DIT no IOB katak agora operadór sira manda ona pulsa ba estudante balu. (ono)
1,864 total views, 6 views today
Bele hare Video Seluk :
Subscribe to Timorpost
