(Reportájen Luís Casmiro/Editor Suzana Cardoso)
SELIHASAN (Timor Post) – Tanba hakanek labarik ida to’o grave, Komunidade Aldeia Selihasan, Suku Betano, Postu Administrativu Same, Munisipíu Manufahi oho tiha lafaek ne’e.
Ba Timor Post, Xefe Aldeia Selihasan, Suku Betano, Saturnina da Silva iha Same, Segunda, (19/07/2021) esplika, iha loron Domingu, (18/7/2021) maizu menus tuku 15:00 OTL labarik sira ba halimar joga bola iha mota Kelen.
Lakleur deit lafaek ne’e mosu mai tata kedas labarik ida ho naran Lusiano da Concicão Fernandes, idade 10. Lusiano nu’udar ida husi labarik sira ne’ebé halimar rame hela bola iha mota laran ne’e, too labarik ne’e hetan kanek grave iha parte kabun.
“Lo’ós horsehik, Domingo iha maizu menus tuku tolu lorokraik, lafaek tata labarik ida iha Aldeia Selihasan, Suku Betano hafoin joga bola iha mota laran,” dehan Xefe Aldeia Selihasan, Saturnina.
Nia hateten, labarik ne’ebé lafaek tata iha Mota Kelen ne’e komunidade husi Aldeia Selihasan, Suku Betano, Postu Administrativu Same Villa ne’e bainhira nia joga bola hela nia kolega sira iha mota laran.
“Lafaek ne’e hakanek labarik refere iha kotuk laran, kelen, liman kabun no kabun kuaze kanek grave tebes, ne’e duni komunidade sira oho tiha lafaek ne’e,” dehan Xefe Aldeia Saturnina.
Haktuir Saturnina, nia parte to’o iha fatin akontesementu tarde oitoan. No to’o ba hare lafaek komunidade oho tiha ona lafaek ne’e. Tanba sira hare sira nia oan lafaek hakanek to’o kondisaun grave.
“Labarik ne’ebé lafaek hakanek ne’e, daudaun ne’e familía desidi lori ba liman badaen hodi halo tratamentu ho aimoruk tradisionál iha uma de’it tanba labarik nia kondisaun grave lo’ós,” dehan Xefe Aldeia Selihasan ne’e.(Lee notísia seluk iha jornál Timor Post)
663 total views, 6 views today
