(Reportajen: Mario da Costa)
DILI (Timor Post) – Organizasaun Sosiedade Sivíl La’o Hamutuk (LH), hanesan organizasaun sosiedade sivíl ne’ebé defende demokrasia, direitu umanus, no solidariedade iha Timor-Leste no mundu tomak, sente triste atu haree Timor-Leste la barani atu vota a favor iha Rezolusaun 75/287 ne’ebé hetan aprovasaun iha Assembleia Jerál ONU nian iha loron 18 fulan Juñu, no votasaun 119-1. Nasaun 36 de’it, inklui Timor-Leste, abstain husi votasaun ne’e. Rezolusaun ne’e kondena golpedestadu militár iha Mianmar no husu ba nasaun hotu atu la fó armas ba rejime militár iha ne’ebá.
“Ami husu estadu RDTL atu informa ONU katak abstensaun la tuir Governu nia intensaun. Karta hanesan ne’e bele fó hanoin ba komunidade internasionál no ditadór iha Myanmar katak Timor-Leste nafatin tuir ita-nia prinsípiu sira,” hatete iha Komunikadu La’o Hamutuk, Timor Post asesu iha tersa (06/07).
Timor-Leste nu’udár país de direitu demokrátiku ne’ebé iha responsabilidade boot atu apoiu direitu umanu, demokrasia no liberdade povu hotu.
“Ita-nia istória La’o ba ukun rasik an mós la sees husi apoiu solidariedade husi komunidade internasionál sira ne’ebé hatudu sira-nia solidariedade ba povu Timor nia La’o hodi kore an husi rejime ditadura militár Indonézia.”
Relatóriu CAVR, CHEGA! Relata no rekomenda ba komunidade Internasionál tomak atu promove ativamente direitus Umanus no demokrasia. Ami kontente katak relatóriu ne’ebé entrega ona ba Nasoins Unidas, nasoins boot sira no organizasaun Internasionál hodi promove no proteje ba beibeik direitus Umanus no demokrasia. Timor-Leste mós labele haluha lalais sofrementu todan ne’ebé hetan husi Militár Indonézia durante okupasaun ilegál iha tinan 24 nian laran.
“Ohin loron Timor-Leste goza nia independénsia maibé labele haluha apoiu sira ne’ebé ita buka, no dala ruma hetan, durante La’o naruk iha pasadu. Ho votu abstain iha rezolusaun ONU, estadu Timor-Leste hatudu derrota atu defende demokrasia no direitu umanu sira,” hatete iha Komunikadu LH “Tanba defende aktu ilegál ne’ebé akontese hela iha Myanmar. Ami hanoin estadu Timor-Leste labele sakrifika Konstituisaun RDTL, tratadu internasionál ne’ebé ita ratifika ona, no prinsípiu estadu de direitu demokrátiku tanba hakarak atu hein unanimidade iha ASEAN, ka tuir Xina nia hakarak.”
Iha tempu 1975-1999, nasaun hotu iha ASEAN apoiu Indonézia nia okupasaun, maibé agora iha mudansa. Membru ASEAN balun, Indonézia, Filipina, Singapura, Vietnam no Malázia, vota favor ba rezolusaun ida ne’e. No embaixadór Myanmar rasik vota favor, tanba nia la rekoñese lejitimidade ba rejime militár ne’ebé kaer podér iha fulan Fevereiru tinan ida ne’e.
“Hanesan ita hotu hatene konflitu iha Myanmar ne’e kontra povu no sistema demokrátiku iha Myanmar; ativista, labarik, feto no ema vulneravel sira sofre iha tinan barak nia laran husi rejime ditadura militár ida ne’e.”
Nune’e, La’o Hamutuk lamenta no triste tebes haree votu abstensaun ne’ebé Timor-Leste fó durante diskusaun no votasaun iha Asembleia Nasoins Unidas ba situasaun Polítika no direitus Umanus atuál Myanmar nian.
“Ami hanoin katak, loloos karik Timor-Leste mak tenke sai ezemplu no pioneiru La’o ba auto determinasaun, demokrasia no direitus Umanus, infelizmente akontese fali oportunizmu iha votu importante ida ne’e. No ami husu ba Sua Exelénsia sira atu esplika ba povu tomak no ba komunidade internasionál tanba sá Timor-Leste deside votu abstain, no oinsá Timor-Leste bele tuir dalan di’ak liu iha futuru.”
Ikus liu, La’o Hamutuk enkoraja polítika na’in sira atu tetu ho didi’ak inklui konsidera impaktu sira molok deside fó votu ba rezolusaun ONU nian, desizaun ne’e sei reprezenta Timor-Leste iha mundu. “Ami husu atu labele repete tan desizaun hanesan ne’e iha futuru tanba de’it ambisaun ou intervensaun ruma husi li’ur.” (Lee Notísia Seluk iha Jornál Diáriu Timor Post)
634 total views, 3 views today
Bele hare Video Seluk :
Subscribe to Timorpost
