Reportajen José Mauno / Editór Noémio Falcão
DILI (Timor Post)—Hafoin fulan haat tutuir malu atividade aprendijajen suspende, professor no estudante Eskola Novel da Paz hahú limpeza jerál hodi prepara ba reativa tuir planu Ministériu Edukasaun Juventude no Desportu (MEJD) iha loron 1 Jullu 2021.
“Atividade ne’ebé mak ohin ami hala’o. Atu halo preparasaun ba prosesu aprendizajen. Sei hahú dia 1 de Jullu tanba durante ne’e estudante hotu-hotu paradu,” Diretór Eskola Novel da Paz, Pedro Menezes Nunes ba Timor Post iha nian kna’ar fatin, Kintal Boot, Dili, Kuarta (23/06/2021).
Diretór Pedro hatete, maski agora estudante balu sei iha foho maibé eskola hahú prepara atu reativa aula prezensial. Eskola mós fó informasaun ba atividade preparasaun no reativa aula prezensial liu husi WA grupu eskola nian.
Nia hatutan, fó ona avizu liuhusi grupu eskola Novel da Paz nian. Nune’e nia fiar estudante hotu rona ona informasaun no ohin duni sira barak ba eskola hodi halo limpeza.
Diretór haktuir, partisipasaun estudante ohin Loron minimu loos hahú ensinu baziku no sekundáriu. Maibé eskola sei fó orientasaun ba estudante sira katak komesa ohin lor-loron tenke mai limpeza tantu sala laran no mós resintu eskola.
“Ami sei fó orientasaun ba sira para lor-loron sira mai halo limpeza jerál tantu sala laran no mós resintu eskola nune’e dia 1 Jullu ami eskola loos ona,” katak Pedro.
“Ha’u nia professór sira 100% simu ona vasina no ha’u informa ona ba edukasaun munisípiu Dili,” Diretór Pedro komenta.
613 total views, 3 views today
