Reportajen José Mauno /Editór Marcos Fernandes
DILI (Timor Post)—Tanba rona informasaun hosi Ministériu Edukasaun Juventude no Desportu katak, fulan Jullu reativa ona aula prezensiál, tanba ne’e mak estudante no Profesór sira iha eskola Nobel da Paz hahú Halo limpeza iha eskola.
Limpeza hanesan fase ida ba preparasaun atu reativa eskola, tanba durante fulan 4 atividade eskola suspende. Entaun atu tama fila fali tenke halo uluk limpeza ba sala aula inklui resintu eskola nian.
“Atividade ne’ebé mak ohin ami hala’o ne’e hodi prepara ba prosesu aprendizajen ne’ebé mak sei hala’o iha loron 1 fulan Jullu, tanba durante ne’e estudante hothotu paradu”, Diretór Eskola Nobel da Paz Pedro Menezes Nunes, ba Timor Post iha nian kna’ar fatin, Quintal boot Dili, kuarta (23/06).
Diretór eskola hatete, maski agora estudante balu sei iha foho, maibé eskola hahú prepara atu reativa aula prezensiál. Eskola mós fó informasaun liuhosi WhatsApp grupu eskola nian.
“Ohin ami fó ona avizu liuhosi WhatsApp grupu eskola Nobel da Paz nian. Nune’e ohin sira mai konsentra rona informasaun, orientasaun halo limpeza atu nune’e dia 1 ami tama ona eskola hodi halo prosesu aprendizajen ba tinan 2021 nian”, nia haktuir.
Pedro haktuir, partisipasaun estudante ohin loron mínimu loos hahú ensinu báziku no sekundáriu. Maibé eskola sei fó orientasaun ba estudante sira katak, komesa ohin loro-loron tenke mai limpeza tantu sala laran no mós resintu eskola.
“Ami sei fó orientasaun ba sira para loro-loron sira mai halo limpeza Jerál tantu sala laran no mós resintu eskola nune’e iha dia 1 Jullu ami eskola loos ona”, katak Pedro.
Ikus Liu Diretór eskola Nobel de Paz informa mós katak, profesór Novel da Paz 100% simu hotu Vasina.
“Agora ha’u nia Profesór sira 100% Simu ona vasina no ha’u informa ona ba Edukasaun Munisípiu Dili”, nia hakotu. (Lee Notísia Seluk Iha Jornál Diáriu Timor Post)
1,310 total views, 3 views today
Bele hare Video Seluk :
Subscribe to Timorpost
