Reporter José Timo Caet/ Editór Marcos Fernandes
DILI (Timor Post)—Prezidente bankada Partidu Unidade Dezenvolvimentu Demokrátiku (PUDD), deputadu António de Sá Benevides, ninia kondisaun saúde daudauk ne’e komesa di’ak tiha ona.
Sekretaria meza Parlamentu Nasionál, deputada Lidia Norberta dos Santos, hatete prezidente Parlamentu Nasionál, Aniceto Longuinhos Guterres Lopes, hakarak aselera lalais prosesu tratamentu saúde ba deputadu ne’e.
Reprezentante povu ne’e esplika, baibain deputadu ne’ebé mak hetan moras iha ona faze krítiku mak foin ba halo tratamentu saúde, maibé deputadu António de Sá Benevides, foin mak hahú moras.
Maibé, grasa adeus meza parlamentu nasionál halo kedas intervensaun hodi dezloka deputadu ne’e ba halo tratamentu saúde iha Jakarta Indonézia.
“Ita hein hela ninia tratamentu saúde, grasa adeus ninia tratamentu agora komesa di’ak”, informa Lidia ba Timor Post iha resintu Parlamentu Nasionál, Tersa (22/06).
Antes ne’e, PPN realiza audiensia ho prezidente interinu PUDD, Silvestre Xavier Sufa, kona-ba substituisaun deputadu António De Sá Benevides.
Hafoin remata audienisa, prezidente interinu ne’e hatete, hothotu hatene katak, bankada PUDD deputa na’in ida de’it, ne’ebé realiza audiensia atu bele iha substituisaun ruma.
“Ami sente katak, laiha reprezentante ba kadeira deputadu nian mamuk, tanba ne’e mak ohin ami mai konsulta ho prezidente parlamentu nasionál, oinsá ba substituisaun ne’e”, informa Silvestre hafoin remata audénsia iha Parlamentu Nasionál, Kinta loro-kraik (17/06).
Sivestre konta, foin daudauk deputadu ne’e dehan, atu halo tratamentu saúde ho durasaun tempu semana ida de’it iha Jakarta Indonézia.
Maibé nia dehan, to’o agora deputadu ninia kondisaun saúde seidauk rekopera, entaun konfirma ho prezidente Parlamentu Nasionál atu bele substitui.
Aleinde kona-ba substituisaun, prezidente interinu ne’e, sei konfirma fali ho deputadu mak foin bele rona rezultadu substituisaun.
“Partidu atu deside substituisaun ne’e, ami sei koordena ba malu, depois mak ami bele ko’alia fali ho prezidente Parlamentu Nasionál”, nia informa. (Lee Notísia Seluk Iha Jornál Diáriu Timor Post)
1,149 total views, 3 views today
Bele hare Video Seluk :
Subscribe to Timorpost
