Jogu Internasionál Kopa Europa sai nafatin eventu favoritu iha mundu liuliu iha kontenente Azul. Nasaun Timor-Leste ne’ebé maoria nia komunidade gosta desportu futeball mós lakohi lakon, ida–idak ho nia maneira espresa apoiu ba ekipa ne’ebé sira gosta, ambitu ida ne’e la’ós de’it da’et ba joven sira, maibé hahú hosi labarik to’o ema boot to’o mós ukun na’in sira.
Jogu ne’ebé hahú iha loron 11 Juñu 2021 ne’e, tama ona ba jogu iha grupu F nian, ne’ebé kuaze Timor laran fans los ba ekipa Portugal, ne’ebé lidera hosi nia Kapitaun Cristiano Ronaldo, jogadór hosi klube Juventus, antes iha Real Madrid.
Hakerek na’in hakarak fahe observasaun ba jestu ekipa futeball sira inklui dezisaun treinadór ba kada jogadór ba lisaun ne’ebé públiku bele aprende sai hanesan referénsia moris.
Hakerek na’in hahú observa ho jogu entre ekipa Dinamarka hasoru Finlandia ne’ebé hala’o iha loron Sábadu (12/06) iha Stadium Kopenhagen, ne’ebé jogu paradu tiha iha jogu primeiru tanba jogadór hosi Dinamarka Cristian Eriksen hetan ataka derrepente ba nia fuan (Kardioku), lisaun importante ne’ebé públiku bele aprende mak, kapitaun hosi ekipa Dinamarka, Simon Kjaer, halo dezisaun radikál hodi halo atende rápida ba Eriksen, antes doutór sira tun ba iha fatin, no jogadór hosi AC Milan ne’e haruka nia ekipa taka metin Eriksen hosi kamera jornalista ne’ebé bele hasai nia situasaun ne’ebé evita hodi públika ba públiku.
La’ós ne’e de’it, ekipa Finlandia ne’ebé sai sira nia adrversaria iha jogu mós hatudu solidariedade hamriik taka metin ekipa Dinamarka, halo parede metin nune’e ema labele haree saida mak kapitaun Simon halo ba Eriksen, maibé situasaun ne’e konsege salva duni Eriksen hafoin doutór sira to’o hodi kompleta tratamentu ba nia.
Ida ne’e atu hatete ba ita katak, iha situasaun saida de’it, presiza lideransa ne’ebé berani foti dezisaun hodi rezolve problema, lideransa hanesan ne’e so ema ne’ebé prepara nia-an hodi aprende ona saida mak nia sei hasouru iha jogu ida nia laran. Alien ne’e iha solidariedade maka’as entre nia membru no ho ekipa ne’ebé sira atu hasoru.
Ba fali jogu entre Portugal ho Hungaria, ne’ebé hala’o iha stadium Budapest, horseik, Kuarta (16/06), madrugada iha fali lisaun seluk ne’ebé públiku bele uza hanesan referénsia. Ita hahú ho jogu primeiru parte, fatór ne’ebé apoiu Hungaria, tanba joga iha sira nia terenu, signifika fatór apoiantes mós determina, maibé sira hasoru jogadór Portugal ne’ebé lidera hosi Kapitaun Cristiano ne’ebé jogadór mundu, halo jogu iha balansu.
Problema ida ne’ebé observa hosi jogu primeiru, haree ba iha jogadór Diogo Jota, nia hetan oportunidade di’ak bainhira kaer bola, maibé nia hahalok egoísta, hakarak halo istória ba nia-an, nia la konsege hatama bola, situasaun ida ne’e nia repete ba dala rua, tuir loloos iha jogu primeiru ekipa Portugal bele hatama golu rua maibé la konsege tanba laiha servisu ekipa ne’ebé di’ak.
Hafoin ba jogu segundu, treinadór Portugal, Fernando Santos, deside troka Diogo. Santos deside Renato Sanches, Raphaêl Guerreiro, haforsa ekipa CR7 iha minutu 10 ikus atu jogu termina. Iha minutu 8 jogu atu remata, Portugal marka istória iha mundu ho golu tolu, hosi Cristiano 2 no Raphaêl ida. Ida ne’e tanba jogadór Rafa Silva hatene nia mesak labele, nia tenke pasa bola ba nia kapitaun hodi kompleta golu. No susesu Portugal nian la sees hosi dezisaun extraordinariu treinadór nian, tanba nia mak hatene forsa no frakeza nia jogadór sira nian.
Hosi Jogu ne’e hakerek na’in halo konkluzaun lisaun moris ba ita hotu atu bele susesu mak Berani, Solidariedade, Servisu Ekipa, Labele Egoista, Respeita Malu, koñese nia ema nia forsa no frakeza (liga ba treinadór nia stratejia monta ema). Ida ne’e mak pasu ida bele kompleta ekipa ida hodi atinji nia mehi.
Ita hatene ida ne’e foin jogu hahú, no ema barak hatete, Portugal sei lakon iha jogu sira tuir mai, tanba hasoru ekipa forte seluk hanesan Fransa no Alemanha, maibé sira kuandu disiplina no la’o, aprende hosi sala iha jogu primeiru, sira bele manan no avansa ba final, tanba ho naran boot ida Cristiano nian.
Iha tan hanoin balun dehan iha istória, Portugal joga hasoru Alemanha, Portugal nunka manan, maibé hakerek na’in atu sita de’it katak, istória bele muda, tanba kada ema ida mak halo istória ba nia-an, kompleta ho ekipa ne’ebé solidu bainhira rona malu, servisu ekipa, iha solidariedade ba malu, satan ba ho treinadór ne’ebé di’ak ho nia estratéjia di’ak, Portugal bele halo istória ba nia-an rasik hamutuk ho Cristiano Ronaldo iha Kopa Euro 2021. (****)
899 total views, 3 views today
Bele hare Video Seluk :