DILI—Ministru Obras Publika (MOP), Salvador Eugenio Soares Pires informa programa Estrada Rural ba Dezenvolvimentu (ERD) ne’e programa governu nian, kapitál investimentu mai husi governu, iha tinan ne’e tau orsamentu kuaze millaun $40-resin.
Husi total orsamentu ne’e, nia afirma, fahe ba millaun $13 resin tau iha liña ministerial hodi halo manutensaun periódika no manutensaun rutina, no millaun $35 ba reabilitasaun nian ne’ebé tau iha fundu infraestrutura ba 69 pakote projetu.
“Governu Australia fó asisténsia tékniku liuhusi ILO, ajuda ita halo planeamentu hanesan dezeñu no mós treinamentu ba ita-nia staff no setór privada sira ne’ebé mak manán tender hodi ka’er projetu sira ne’e, liuliu sira nia jestór ba projetu, para implementa projetu tuir padraun ne’ebé mak ita iha,nune’e rezulta projetu ne’ebé iha kualidade,” ministru Salvador informa ba jornalista sira, iha Otél Novo Turizmu hafoin lansa projetu ERD ne’e, Kinta (10/06).
Ezekutivu ne’e dehan, pakote Estrada Rural ba tinan ida ne’e iha liña ministériu no fundu infraestrutura kuaze 136, ho orsamentasaun kuaze millaun $40 resin, millaun $35 tau iha fundu infraestrutura no millaun $13 resin mak iha liña ministériu nian.
“Ohin ita mai halo uluk aseitasaun ba munisípiu-lima nian, tanba prosesu verifikasaun ita loke uluk tender pakote balu, balu ita foin loke prosesu tenderizasaun, balu sei iha private no balu tama ona prosesu kontratasaun. Entaun ohin munisípiu lima; Dili, Baukau, Vikeke, Manatutu no mós Likisá, ne’e ita tama ona prosesu aseitasaun, la kleur tan sira bele tama ona asina kontratu no bele halo mobilizasaun ba manutensaun rutina no mós manutensaun periódiku iha liña ministériu nian,” Salvador afirma.
Salvador hateten, total investimentu iha Estrada Rural ne’e, kuaze 816km, iha Orsamentu Jerál Estadu (OJE) tinan 2021.
“Ha’u husu ba kompañia implementador sira, atu fó sira-nia abilidade tomak implementa projetu ne’e iha kualidade, tanba investimentu ne’e uza osan povu nian, kada investimentu no kada sentavu tenke lori ré-tornu ekonómika, para realiza vizaun governu nian atu hametin konektividade fíziku ba fasilita ita-nia dezenvolvimentu ekonómiku,” Salvador apela.
Iha fatin hanesan, Diretora Kompañia Rozi Construction, Rosa Maria Hornay, husi Munisípiu Baukau, hateten karta aseitasaun ne’ebé sira asina, fó ona responsabilidade ba kompañia sira, oinsá atu implementa projetu ne’ebé hetan konfiansa husi governu atu bele implementa projetu tuir regras ne’ebé iha ona kontratu laran.
“Hanesan emprezária feto timoroan, hakarak mós fó ami nia kontribuisaun ba dezenvolvimentu ita-nia rai doben Timor-Leste,” nia katak.
Rosa dehan, Kompañia Rozi Construction ka’er pakote rua ho estrada kilómetru rua, hahú husi Oso-ala ba to’o iha Loilubu. No tuir BOQ projetu refere sei termina iha tinan ne’e.
“Ha’u hetan iha pakote rua, hamutuk kilómetru rua resin ho montante orsamentu $600 mill resin, kaer husi Oso-ala ba too iha Loilubu. Ami garantia kualidade, tanba ami nia rekursu sira preparadu,” Rosa hatete. (jry)
890 total views, 3 views today
Bele hare Video Seluk :