(Reportájen Olga Soares/Editor Suzana Cardoso)
DILI (Timor Post) – Sidadaun feto nain rua hakotu is iha Sentru Izolamentu Vera Cruz hafoin transporta husi Hospital Nasional Guido Valadares (HNGV) no hetan tratamentu ho loron ne’ebé diferente iha Sentru Izolamentu Vera Cruz.
Sidadaun feto nain rua ne’e mate lahanesan. Matebian ho naran Francisca Gusmão (73) hela iha Surik Mas Dili hakotu is iha Sábadu, 22 Maiu 2021, iha tuku 9.40 dader. Mai husi Postu administrativu Kailaku, Munisípiu Bobonaro. Ema kemak oan.
Liu loron ida, Dominggu, (23/5/2021) iha tuku 9:30 pasiente Vera Cruz ida mate tan. Matebian Mariana Ximenes (52) hela iha Tasi Tolu Dili, husi Postu Administrativu Fatuberliu, Munisipiu Manufahi. Matebian Laklei oan.
“Ami lori Mãe sai husi uma Tasi-Tolu ba iha Sentru Saúde Komoro. Too ne’ebá ho kondisaun grave. Iha Loron Sesta, (22/5/2021), médiku sira transfere kedas ba HNGV depois halo swab. Rezultadu teste pozitivu Covid-19. Nune’e, evakua kedas mai izolamentu Vera Cruz. Iha Domingu, (23/5/2021), Mãe hakotu is,” katak Joel.
Oan mane husi matebian Mariana Ximenes, Joel Xavier, hateten nia inan moras Komplikadu no moras kleur ona.
Tanba ho ístoria moras komplikadu mak Joel kestiona nia Mãe Mariana ne’ebé suspeitu ho Covid-19 hodi hateten, “Ha’u nia inan sai husi uma ba Sentru saúde Komoro ho kondisaun grave los ona. Tanba matebian sofre hela moras stomach, ran midar no pullmaun.”
Matebian Mariana mate husik hela oan nain 6. Feto rua no mane nain haat. Matebian ninia rezidensia atuál iha Tasi Tolu, Aldeia 12 Otubro, suku Komoro Postu Administrativu Don Aleixo, Munisípiu Dili. Familia desidi Matebian sei halot iha semiteriu públiku Tasi Tolu.
Enkuantu Oan mane husi Matebian Francisca Gusmão (73), Amandio Gumão Soares ba Timor Post espresa ninia sentimentu tristeza lakon inan ida husi oan sira nia leet.
“Ami sente triste lakon inan husi ami oan sira nia let. Mâe sofre moras diabetes durante tinan 20. Durante ne’e moris ho daun. Kada loron sona ho insulin dala tolu. Ba HNGV tau soru no sona ho antibiotic, fila uma kondisaun normal fila-fali ona,” katak Amandio.
Maibé hatutan Amandio, iha loron Kuarta, (12/5/2021) derepente hetan ataka husi isin manas akompaña ho is boot. Hafoin lori ba hospital hetan teste swab. Hosi rezultadu deteta pozitivu Covid-19.
Antes ne’e konta Amandio, iha loron 12 Maiu matebian hetan ataka. No kontinua fali iha loron 13 Maiu. Matebian mós han ladiak. Nune’e familía deside lori ba HNGV. Médiku sira hasai ran no teste swab. Rezultadu pozitivu Covid-19.
“Momentu mâe nia rezultadu husi médiku dehan pozitivu Covid-19, ha’u mós ho laran tauk oinsá mak atu komvense mâe hodi simu realidade ne’e. Ha’u fò hatene katak, mâe hetan Covid-19. Mâe simu hodi dehan; ha’u mak kona ona Covid-19, ha’u ba Vera Cruz, imi oan sira sei la hare ona ha’u,” hasara Amandio hodi hatutan familia desidi sei halot mate isin iha nia moris fatin.
To’o notísia ne’e publika matebian na’in rua ida husi Munisípiu Bobonaru no ida seluk husi Manufahi. Sira rua sei kontinua rai iha izolamentu Vera Cruz. Tuir informasuan matebian nain rua ekipa Sentru Integradu Jestaun Krize (SIJK), sei entrega ba familía iha loron, Segundu, (24/05/2021).(Lee notísia seluk iha jornál Timor Post)
713 total views, 3 views today
