(Reportájen Olga Soares/Editor Suzana Cardoso)
DILI (Timor Post) – Atu tulun Profisionál saúde iha liña Frente para atende hapara Covid-19 nia dait iha Timor-Leste maka Embaixada Estadus Unidus (EUA) iha Timor-Leste fó doasaun ekipamentu médiku.
“Husi EUA oferese dau-daun ekipamentu médiku importante hirak ne’e ba governu Timor-Leste para ajuda pesoal saúde sira mia servisu hodi hatán ba Covid-19.”
Lia fuan hirak ne’e hato’o husi Embaixadór EUA, Kevin Blackstone iha ninia deskursu iha Sentru Konvensaun Dili, Kuarta (28/4/2021) hafoin entrega ekipamentus médiku iha Sala Situasaun Sentru Integradu Jestaun Krize (SS-SJIK).
Ekipamentu hirak ne’ebé intrega husi EUA ne’e maka hanesan; Mákina Presaun Pozitiva Kontínua Vias Respiratórias (CPAP) hamutuk 20 no Kapus Terapia Oksijéniu lubuk ida.
Hateten Embaixadór EUA Kevin, durante pandemia Covid-19 médiku Amerikanu sira iha Universidade Rhode Island konverte ona mákina CPAP hodi uza ba trata problema respiratóriu ho forma foun.
Katak Kevin, tratamentu oksijéniu la invazivu ba pasiente Covid-19 sira. Ekipamentu hirak ne’e sei permite profisionál saúde liña frente sira bele fornese terapia oksijéniu ne’ebé ema barak karik bele presiza.
Diplomata ne’e hateten, ekipamentu hirak ne’e komprova ona uza ho di’ak tebes iha tratamentu ba pasiente Covid-19 iha Estadus Unidus. Ekipamentu doasaun hirak ne’e sei fó ba espesialista sira para kuidadu sira nia saúde ba opsaun tratamentu oioin enkuantu ita hotu luta hamutuk hasoru pandemia ida-ne’e.
“Ekipmanetu hirak ne’ebé fornese husi Universidade Rhode Island no Guarda Nasionál Rhode Island halo parte iha Programa Parseria Estaduál (SPP) ne’ebé estabelese entre Rhode Island no Timor-Leste,” dehan Kevin.
Nia hateten, SPP nu’udar Ministériu Defeza EUA nia programa kooperasaun seguransa ne’ebé liga Guarda Nasionál husi Estadu ida ka territóriu EUA nian. Liu husi forsas armadas, forsa seguransa ka ajénsia governamentál husi país parseiru ida para responde ba emerjénsia no dezastre sira.
Dadaun ne’e ho tinan 27 Kevin hatutan, programa refere oferese relasaun kooperasaun ho benefísiu ba parte rua no dura ba tempu naruk entre estadu ida-idak iha Estadus Unidus nian ho nasaun parseiru sira iha mundu tomak.
“Projetu ne’e kalkula ba montante liu millaun U$1,6 ne’ebé Estadus Unidus kompromete ona hodi tulun Governu Timor-Leste para kombate hasoru Covid-19,” dehan Embaxador Kevin hodi hatutan.
Montante inisiál biliaun U$2 husi planu totál billiaun U$4 hodi apoia Kompromisu Avansadu ba Merkadu COVAX nian ne’ebé sei apoia distribuisaun vasina Covid-19 ba país sira liu 90, inklui Timor-Leste.
Ekipamentu hirak ne’e entrega diretamente husi Embaixadór EUA Kevin Blackstone ba no Xefe Gabinete Kooperasaun Defeza Majór Pablo Valerin ba Brigadeiru Jenerál- Aluk Descartes.
Iha parte seluk Segundu Komandante Operasaun SS-SIJK, Brigadeiru Jenerál, João Miranda Aluk Descartes hatoo agradese ba Embaixadór EUA iha TL ne’ebé apoiu ona ekipamentu ventilator no ekipamentus importante selseluktan ne’ebé atu fasilita iha problema inspirasaun karik halo viajen ruma.
“Ekipamentu hirak ne’e atu kombate Covid-19. Aproveita oportunidade lori SIJK nia naran fó agradese ba Embaixadór EUA ba apoiu ne’ebé la’ós foin mak fó ajudu ba ita. Maibé hahú husi restaura ita nia independensia liu husi area kooperasaun oioin, ” katak Aluk.(Lee Notisia Seluk Iha Jornál Timor Post)
1,310 total views, 9 views today
Bele hare Video Seluk :
Subscribe to Timorpost
