(Reportájen Mariano Martins/Editor Suzana Cardoso)
DILI (Timor Post) – Lider Nasionál Timor-Leste, Kay Rala Xanana Gusmão hato’o mensajen solidariedade ba povu Indonézia ne’ebé lakon sira nia eroi militár na’in-53 ho Ró Sub Marino Naggala 402 ne’ebé mout iha loron Kuarta, (21/4/2021) hafoin realiza treinamentu iha tasi Provínsia Bali, Indonézia.
Tuir komunikadu imprensa ne’ebé Timor Post asesu hateten, Xanana Gusmão hato’o espresaun sentimentu triste ba Governu Indonézia ho nia povu liu-liu família sira ne’ebé lakon eroi militár Indonézia iha asidente ne’e.
Xanana hato’o kondolénsias ne’e liu hosi karta formál ne’ebé nia rasik hakerek ho asinatura hodi haruka ba Governu Indonézia liu hosi Ministra Negósiu Estranjeiru, Madam Reto Lestari Priasari Marsudi.
“Hafoin akompaña asidente kona-ba Karina Nanggala 402 mout ho ema Militár Marineru na’in-53. Ha’u hakarak hato’o ha’u nia sentidu kondolénsias ba ita boot (Madam Reto Lestari Priasari Marsudi) ba Governu Indonézia liu-liu ba família vítima sira ne’ebé afeita hosi insidente ne’e,” dehan Xanana liu hosi nia karta ne’ebé haruka ba Governu Indonézia.
Eis Presidente Repúblika RDTL ne’e hateten, tau esperansa boot ba ekipa Governu Indonézia atu buka tuir lalais vítima sira. Xanana konsidera dezastre ne’ebé militár sira hasoru nu’udar tristeza ba militár sira iha mundu tomak.
Ró Sub Marino Nangaala II nu’udar ró segundu Estadu Indonézia nian ne’ebé sosa iha tinan 1981 iha Fabrika Nasaun Alemaña Howaldt Deutsche Werke (HDW) Kiel Alemaña 1977 ho modelu U-209/1300 ho nia naruk metru 59,5.
Ró ne’e ho todan tonelada 1.395 ho membru 50 no halai ho velosidade 25knoot, xefia hosi Komandante KRI Nanggala-402, Letkol Heri Oktavian ho membru 53. Sirahotu mate hafoin ró ne’e mout ba tasi laran ho distánsia metru 838.(Lee notisia seluk iha Jornál Timor Post)
1,484 total views, 3 views today
Bele hare Video Seluk :