DILI- Prezidente Repúblika, Francisco Guterres Lú Olo, iha loron 13 fulan dezembru 2019 ezerse nia kompeténsia tuir artigu 85, a, c no artigu 88, númeru 4 no artigu 149 númeru 1, 2 no 3, hodi veta projetu Dekretu-Lei ne’ebé simu husi Governu Daualu kona-ba Regime Estadu fó apoiu diretu ba Órgaun Komunikasaun Sosiál sira.
“Prezidente Repúblika veta projetu Dekretu-Lei ne’e tanba haree katak Governu hili de’it subvensaun públika nu’udar dalan ida atu apoia Órgaun Komunikasaun Sosiál sira no asosiasaun jornalista,” Prezidente Repúblika Francisco Guterres Lú Olo subliña iha komunikadu ba imprensa ne’ebé Timor Post asesu, Segunda (13/01/2020).
Lú Olo hatutan, apoiu ho de’it subvensaun públika la favorese sustentabilidade ba órgaun komunikasaun sosiál sira maibé kria dependénsia husi Governu no ida ne’e hamate kriatividade órgaun Komunikasaun Sosial sira-nian.
“Fó osan de’it bele hamosu risku kontrolu husi Governu ba Órgaun Komunikasaun Sosial, inkluindu ba privadu sira no nune’e, bele hamate liberdade espresaun no asaun husi media sira,” Lú Olo salienta.
Nune’e Xefe Estadu argumenta katak, presiza haree oinsá fó apoiu ba Órgaun Komunikasaun Sosiál ho sistema tomak ida, ne’ebé diversifikadu no kompletu, inklui fó formasaun, apoiu ba jestaun no meius teknolójiku.
“Ida ne’e mak Lei Komunikasaun Sosial haruka halo. Atu kria sistema apoiu diversifikadu no kompletu liuhosi apoiu diretu no indiretu husi Estadu ba Órgaun Komunikasaun Sosiál sira tenik nia.
Maibé tuir nia katak, projetu Dekretu-Lei ne’ebé VIII Governu haruka mai Prezidente Repúblika la regulamenta orientasaun husi Lei Komuniskasaun Sosiál tanba haree dalan ida de’it: fó osan biar hatete katak tenke tuir kontratu no konkursu.
Enkuantu ho subvensaun públika de’it , sei iha mós aumentu tinan-tinan iha dotasaun orsamentál ba Transferénsia Públika. Dalan ida ne’e sei hatodan Orsamentu Jerál Estadu tinan-tinan, ne’ebé depende ba únika fonte reseita, ita-nia Fundu Petrolíferu. Governu iha obrigasaun atu hatudu dalan seluk atu hamenus dependénsia husi Fundu Peterolíferu.
Prezidente Repúblika fiar katak bainhira Governu hatuur sistema kompletu ida hanesan lei Komunikasaun Sosial haruka, Órgaun Komunikasaun Sosiál sira sei haburas sira-nia kondisoins atu bele hamriik mesak loron ruma, iha tempu badak, ho kbiit rasik, hakarak rasik no neon rasik. Bainhira hamriik mesak ona, órgaun komunikasaun sosiál no jornalista sira bele iha liberdade tomak atu ko’alia no hakerek tuir étika jornalista haruka no nune’e , kontribui ba hametin demokrasia iha ita-nia rai doben no eduka ita-nia ema ho di’ak.
Projetu Dekretu-Lei ne’e rasik ko’alia kona-ba apoiu husi Estadu ba Órgaun Komunikasaun Sosial. Maibé iha ninia konteúdu, Governu haluan definisaun órgaun komunikasaun sosial tanba hatama mós asosiasaun jornalista sira-nian. Asosiasaun jornalista la’ós órgaun komunikasaun sosial. Ne’e hatudu katak Dekretu-Lei ne’e, mak promulga karik, boot liu fali Lei Komunikasaun Sosial.
Veto husi Prezidente Repúblika ba projetu Dekretu-Lei ne’e la signifika katak Governu tenke hamate apoiu ne’ebé fó dadaun ba Órgaun Komunikasaun Sosiál sira. Nune’e veto ne’e la’os atu hamate inisiativa Governu nian atu halo regulamentasaun ba Órgaun Komunikasaun Sosiál sira.
Tanba ne’e relasiona ho Veto ne’e husu ba VIII Governu atu hadi’a no hamosu Dekretu-Lei ida ne’ebé bele hatán loloos ba orientasaun husi Lei Komunikasaun Sosiál rasik.
“Prezidente Repúblika hakarak ajuda Governu halo regulamentasaun ba lei ida ne’ebé reflekte no fó dalan ba polítika apoiu diretu no indiretu, kompletu no efetivu ba Órgaun Komunikasaun Sosial sira,” Nia hakotu. (res)
981 total views, 3 views today
Bele hare Video Seluk :
Subscribe to Timorpost
